മീഡിയ രംഗത്തും ചരിത്രം കുറിക്കാനൊരുങ്ങി അദാനി ഗ്രൂപ്പ്; എന്‍.ഡി.ടിവി ഏറ്റെടുത്തു, ഇനി മലയാളം അടക്കം 14 ഭാഷകളില്‍ ന്യൂസ്‌വെബ് സൈറ്റുകള്‍

മുംബൈ: ഇന്ത്യയിലെ ഏറ്റവും വലിയ മൂന്നാമത്തെ ബിസനസ് ഗ്രൂപ്പായ അദാനി പുതിയ ചരിത്രം കുറിക്കാനൊരുങ്ങുന്നു. മീഡിയ രംഗത്തേക്ക് ആദ്യമായി ചുവട് വച്ച് എന്‍ഡിടിവി ഏറ്റെടുക്കുന്നു. അദാനി എന്റെര്‍പ്രൈസസ്‌ ലിമിറ്റഡിന്റെ ഉടമസ്ഥതയിലുള്ള എഎംജി മീഡിയ നെറ്റ്വര്‍ക്ക് ലിമിറ്റഡിന്റെ (എഎംഎന്‍എല്‍) പൂര്‍ണ ഉടമസ്ഥതയിലുള്ള വിശ്വപ്രധാന്‍ കൊമേഴ്‌സ്യല്‍ പ്രൈവറ്റ്‌ ലിമിറ്റഡ് (വിസിപിഎല്‍) വഴിയാണ് ഓഹരികൾ സ്വന്തമാക്കുന്നത്. 29.18 ശതമാനം ഓഹരികള്‍ അദാനി ഗ്രൂപ്പ് ഏറ്റെടുക്കുന്നുണ്ട്. ഓണ്‍ലൈന്‍ ബൈവ് ശൃഖലയ്ക്ക് തുടക്കമിട്ടുകൊണ്ടാണ് അദാനി ഗ്രൂപ്പ് മീഡിയ രംഗത്ത് ആദ്യമായി ചുവട് ഉറപ്പിക്കാന്‍ ശ്രമിക്കുന്നത്. ഇതിന്റെ ഭാഗമായി മലയാളം അടക്കം 14 ഭാഷകളിലുള്ള വെബ്‌സൈറ്റ് ഉടന്‍ പുറത്തിറങ്ങും.

അദാനി ഗ്രൂപ്പിന്റെ മീഡിയ സംരംഭത്തിന്റെ ചീഫ് എഡിറ്ററായി മാധ്യമപ്രവര്‍ത്തകന്‍ സഞ്ജയ് പുഗാലിയെ അടുത്തിടെ നിയമിച്ചിരുന്നു. ഇദേഹത്തിന്റെ നേതൃത്വത്തിലാണ് എന്‍ഡി ടിവിയുടെ മാതൃസ്ഥാപനമായ ദില്ലി ടെലിവിഷന്‍ കമ്പനിയുമായി അദാനി ഗ്രൂപ്പ് ചര്‍ച്ച നടത്തിയത്.

കഴിഞ്ഞ സെപ്റ്റംബറില്‍ ഇതു സംബന്ധിച്ചുള്ള വാര്‍ത്തകള്‍ പുറത്തുവന്നെങ്കിലും അദാനി ഗ്രൂപ്പിന് കമ്പനി വില്‍ക്കുന്നതു സംബന്ധിച്ച അഭ്യൂഹങ്ങള്‍ എന്‍ഡിടിവി മാനേജ്‌മെന്റ് നിഷേധിക്കുകയായിരുന്നു. പുതിയ മാധ്യമ സ്ഥാപനം തുടങ്ങുന്നതിനേക്കാള്‍ പ്രധാനം എന്‍ഡിടിവി ഏറ്റെടുക്കുന്നതിനാണ് അദാനി ഗ്രൂപ്പ് നല്‍കിയത്. ദൃശ്യമാധ്യമ രംഗത്ത് ചുവട് ഉറപ്പിക്കുന്നതിന്റെ ഭാഗമായി നഷ്ടത്തില്‍ നിന്നും നഷ്ടത്തിലേക്ക് കൂപ്പ് കുത്തുന്ന എന്‍ഡി ടിവിയെ അദാനി ഏറ്റെടുത്തത്.