‘ഇയാള് നമ്മളെ കൊയപ്പത്തിലാക്കും’: നിയമസഭയിൽ ജലീലിനെ പറ്റിയുള്ള ശൈലജ ടീച്ചറിന്റെ ആത്മഗതം മൈക്കിലൂടെ കേട്ട് കേരളം, പ്രതിരോധത്തിലായി സിപിഎം

തിരുവനന്തപുരം: ലോകായുക്ത നിയമഭേദഗതി പ്രമേയ അവതരണം നടക്കുന്നതിനിടെ കെ.ടി ജലീലിനെതിരെ നിയമസഭയിൽ ശൈലജ ടീച്ചർ പറഞ്ഞ ആത്മഗതം കേരളമൊന്നാകെ മുഴങ്ങി. ‘ ഇയാള് നമ്മളെ കൊയപ്പത്തിലാക്കും’ എന്നായിരുന്നു കെ.കെ ശൈലജ സഭയിൽ ആത്മഗതം പറഞ്ഞത്. എന്നാൽ ഇത് പറഞ്ഞപ്പോൾ സഭാ മൈക്ക് ഓഫ് ആക്കാൻ ടീച്ചർ മറന്നുപോയി. തുടർന്ന് പരാമർശം അല്പം ഉച്ചത്തിലാവുകയും മാദ്ധ്യമങ്ങൾ അത് പുറത്തുവിടുകയും ചെയ്തു. ലോകായുക്ത ചർച്ചയിൽ കെ.കെ ശൈലജ മറുപടി പറഞ്ഞ് ഇരിക്കവെ അഭിപ്രായം പറയാനായി കെ.ടി ജലീൽ എഴുന്നേൽക്കവെ ആയിരുന്നു സംഭവം.

ഇടത് സർക്കാരിന് കെ.ടി ജലീൽ മൂലം ഇതിനോടകം നിരവധി പ്രശ്നങ്ങൾ ഉണ്ടായിട്ടുണ്ട്. എന്നാലും പാർട്ടിയോ, മുഖ്യമന്ത്രിയോ ജലീലിനെതിരെ ഒരു പരസ്യ പരാമർശവും നടത്തിയിട്ടില്ല എന്നതും ഏറെ ചർച്ചചെയ്യപ്പെടുന്ന വിഷയമാണ്. എന്നാൽ സിപിഎം നേതാക്കളുടെ മനസ്സിലുള്ള കാര്യമാണ് കെ.കെ ശൈലജയുടെ ആത്മഗതത്തിലൂടെ പുറത്തുവന്നിരിക്കുന്നത്. ഇയാൾ നമ്മളെ കുഴപ്പത്തിലാക്കും എന്ന ചിന്താഗതി ഇടതുമുന്നണി നേതാക്കളുടെ ഇടയിലും ഉണ്ട് എന്നതാണ് പൊതുവെ ചർച്ച.

നിയമസഭയിലെ വാർത്ത വിവാദമായതോടെ വിശദീകരണവുമായി കെ.കെ ശൈലജ രംഗത്തെത്തി. ‘നിയമസഭയിൽ ചൊവ്വാഴ്ച ലോകായുക്ത (ഭേദഗതി) ബിൽ സബ്ജക്ട് കമ്മറ്റിക്ക് അയക്കാനുള്ള പ്രമേയം അവതരിപ്പിച്ചത് ഞാനാണ്. പ്രസംഗത്തിനിടെ ബഹു അംഗം കെ ടി ജലീൽ ഒരു ചോദ്യം ഉന്നയിച്ചു. അതിനു വഴങ്ങി സീറ്റിൽ ഇരിക്കുമ്പോൾ, പ്രസംഗ സമയം നഷ്ടപ്പെടുമല്ലോ എന്നോർത്ത് അടുത്തിരുന്ന സ. സജി ചെറിയാനോട് പറഞ്ഞ ഒരു വാചകം തെറ്റിദ്ധരിപ്പിക്കുന്ന തരത്തിൽ പ്രചരിപ്പിക്കപ്പെടുന്നത് ഖേദകരമാണ്. അത് ഡോ. ജലീലിനെതിരാണെന്ന ആക്ഷേപം കഴമ്പില്ലാത്തതും ദുരുപദിഷ്ടവുമാണ്’. എന്നാണ് ശൈലജ ടീച്ചർ വാദിക്കുന്നത്.