“പ്രോജക്റ്റ് അനന്ത” തിരുവനന്തപുരം വിമാനത്താവള വികസനത്തിൽ 1,300 കോടി രൂപയുടെ നിക്ഷേപം നടത്താനൊരുങ്ങി അദാനി ഗ്രൂപ്പ് ; ക്ഷേത്ര സമുച്ചയങ്ങളുടെ വാസ്തുവിദ്യയിൽ പുതിയ ടെർമിനലും

2027-ഓടെ തിരുവനന്തപുരം അന്താരാഷ്ട്ര വിമാനത്താവളത്തിൽ 1,300 കോടി രൂപയുടെ നിക്ഷേപം നടത്തുമെന്ന് അദാനി എയർപോർട്ട് ഹോൾഡിംഗ്‌സ് ലിമിറ്റഡ് (എഎഎച്ച്എൽ). “പ്രോജക്റ്റ് അനന്ത” എന്ന് പേരിട്ടിരിക്കുന്ന പദ്ധതിയിലൂടെ വിമാനത്താവളത്തിലെ സൗകര്യങ്ങൾ വർധിപ്പിക്കാനാണ് ലക്ഷ്യമിടുന്നത്.
കേരളത്തിലെ ക്ഷേത്ര സമുച്ചയങ്ങളുടെ രൂപകല്പനയെ മാതൃകയാക്കി അതേ വാസ്തുവിദ്യയിലാകും പുതിയ ടെർമിനലിന്റെ രൂപകൽപ്പന. പുതിയ ടെർമിനലിൽ ഹോട്ടൽ, റസ്റ്റോറന്റുകൾ അഡ്മിനിസ്‌ട്രേറ്റീവ് സ്‌പെയ്‌സുകൾ എന്നിവ ഉൾപ്പെടും. സന്ദർശകർക്കും യാത്രക്കാർക്കും മെച്ചപ്പെട്ട കാർ പാർക്കിങ് സൗകര്യവും ഉണ്ടാകും. ഒരു പുതിയ എയർ ട്രാഫിക് കൺട്രോൾ (ATC) ടവർ, ഒരു അന്താരാഷ്ട്ര കാർഗോ കോംപ്ലക്സ്, റിമോട്ട് ചെക്ക്-ഇൻ ഓപ്ഷനുകൾ എന്നിവയും നവീകരത്തിന്റെ ഭാഗമായി നിർമ്മിക്കും. 2021 ഒക്ടോബറിലാണ് തിരുവനന്തപുരത്തെ അന്താരാഷ്ട്ര വിമാനത്താവളത്തിൻ്റെ നടത്തിപ്പ്, വികസനം എന്നിവ അദാനി എയർപോർട്ട് ഹോൾഡിംഗ്സ് ലിമിറ്റഡ് ഏറ്റെടുത്തത്.

നിലവിൽ, 45,000 ചതുരശ്ര മീറ്റർ വിസ്തൃതിയുള്ള വിമാനത്താവളത്തിൽ പ്രതിവർഷം 32 ലക്ഷം പേരാണ് യാത്രക്കാരായി എത്തുന്നത്. വിമാനത്താവളം 165,000 ചതുരശ്ര മീറ്ററായാണ് വിപുലീകരിക്കുന്നതോടെ പ്രതിവർഷം 120 ലക്ഷം യാത്രക്കാരെ സ്വീകരിക്കാൻ കഴിയും. വികസന പ്രവർത്തനങ്ങൾ ഈ സാമ്പത്തിക വർഷം നിർമ്മാണം ആരംഭിക്കുമെന്നും 2027 ഓടെ പൂർത്തിയാകുമെന്നും പ്രതീക്ഷിക്കുന്നതായും എഎഎച്ച്എൽ വ്യക്തമാക്കി.