ആധാര്‍ കാര്‍ഡ് അപ്‌ഡേറ്റ് അടക്കമുള്ള സേവനങ്ങള്‍ ഇനി വീട്ടുപടിക്കല്‍ ലഭ്യമാക്കും; പുതിയ പദ്ധതിയുമായി യുഐഡിഎഐ

ദില്ലി: വീടുതോറുമുള്ള ആധാർ സേവനം ആരംഭിക്കാൻ യുനീക് ഐഡന്റിഫികേഷൻ അതോറിറ്റി ഓഫ് ഇൻഡ്യ പദ്ധതിയിടുന്നു . ഇനി മുതൽ ഒരു സർകാർ ഓഫീസിലും ഇതിനായി കയറിയിറങ്ങേണ്ട പോസ്റ്റ്മാൻ നിങ്ങളുടെ വീട്ടിലെത്തി ആധാർ സേവനങ്ങൾ നൽകും . യു.ഐ.ഡി.എ.ഐ ഇതിനായി ഇൻഡ്യ പോസ്റ്റ് പേയ്മെന്റ് ബാങ്കിലെ 48,000 പോസ്റ്റ്മാൻമാർക്ക് പരിശീലനം നൽകുന്നു .

രാജ്യത്തിന്റെ വിദൂര ഭാഗങ്ങളിൽ വീടുവീടാന്തരം കയറിയിറങ്ങി മൊബൈൽ ഫോൺ നമ്പരുമായി ആധാർ നമ്പറുകൾ ബന്ധിപ്പിക്കുന്നതിനും വിശദാംശങ്ങൾ അപ്ഡേറ്റ് ചെയ്യുന്നതിനും കുട്ടികളെ ചേർക്കുന്നതിനും പരിശീലനം നൽകും . ആധാർ കാർഡ് ഉടമകളുടെ ആവശ്യമായ വിശദാംശങ്ങൾ അപ്ഡേറ്റ് ചെയ്യുന്നതിന് ഡെസ്ക്ടോപ് അല്ലെങ്കിൽ ലാപ്ടോപ് അടിസ്ഥാനമാക്കിയുള്ള ആധാർ കിറ്റുകൾ പോലുള്ള ആവശ്യമായ ഡിജിറ്റൽ ടൂളുകൾ യു.ഐ.ഡി.എ.ഐ പോസ്റ്റ്മാൻമാർക് നൽകും .

ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിന്റെ പൊതു സേവന കേന്ദ്രവുമായി നിലവിൽ പ്രവർത്തിക്കുന്ന 13,000 ബാങ്കിംഗ് കറസ്പോണ്ടന്റുമാരെ ബന്ധിപ്പിക്കാനും യു.ഐ.ഡി.എ.ഐ പദ്ധതിയിടുന്നുണ്ട് . ഐ.പി.പി.ബി പോസ്റ്റ്മാൻമാർകും സിഎഎസ്സി ബാങ്കിംഗ് കറസ്പോണ്ടന്റുകൾക്കും ആധാർ വിശദാംശങ്ങൾ ശേഖരിക്കാനും അപ്ഡേറ്റ് ചെയ്യാനും കഴിയുന്ന തരത്തിൽ രാജ്യത്തെ 755 ജില്ലകളിലും ആധാർ സേവാ കേന്ദ്രങ്ങൾ തുറക്കാനും പദ്ധതിയുണ്ട് . നിലവിൽ 72 നഗരങ്ങളിലായി 88 യു.ഐ.ഡി.എ.ഐ സേവാ കേന്ദ്രങ്ങളുണ്ട് .