എഡിഎം നവീൻ ബാബുവിന്റെ മരണം ! പി പി ദിവ്യയ്‌ക്കെതിരെ ആത്മഹത്യാ പ്രേരണക്കും നരഹത്യക്കും കേസെടുക്കണമെന്നാവശ്യപ്പെട്ട് മുൻ കേന്ദ്രമന്ത്രി രാജീവ് ചന്ദ്രശേഖർ

തിരുവനന്തപുരം : യാത്ര അയപ്പ് ചടങ്ങിൽ ക്ഷണിക്കപ്പെടാത്ത അതിഥിയായിയെത്തി നടത്തിയ അധിക്ഷേപത്തിൽ മനംനൊന്ത് എഡിഎം നവീൻ ബാബു ആത്മഹത്യ ചെയ്ത സംഭവത്തിൽ കണ്ണൂരിലെ സിപിഎമ്മിന്റെ ജില്ലാ പഞ്ചായത്ത് പ്രസിഡന്റ് പി പി ദിവ്യയ്‌ക്കെതിരെ ആത്മഹത്യാ പ്രേരണക്കും നരഹത്യക്കും കേസെടുക്കണമെന്നാവശ്യപ്പെട്ട് മുൻ കേന്ദ്രമന്ത്രി രാജീവ് ചന്ദ്രശേഖർ.
യാത്രയയപ്പ് ചടങ്ങിലേക്ക് പി .പി ദിവ്യ ക്ഷണിക്കാതെയെത്തിയത് നവീൻ ബാബുവിനെ കരുതിക്കൂട്ടി ആക്ഷേപിക്കാൻ വേണ്ടി മാത്രമായിരുന്നുവെന്നും സഹപ്രവർത്തകരുടെ മുന്നിൽ വച്ചുള്ള അപമാനത്തിൽ മനം നൊന്താണ് നവീൻ ബാബു ജീവനൊടുക്കിയതെന്നും രാജീവ് ചന്ദ്രശേഖർ പറഞ്ഞു.

“തങ്ങളുടെ കൊള്ളരുതായ്മകൾക്കും അഴിമതിക്കും കൂടെ നില്ക്കാത്ത ഉദ്യോഗസ്ഥരെ മനോവീര്യം കെടുത്തി അടിമകളാക്കുക. എന്നിട്ടും വഴങ്ങാത്തവരെ പരസ്യമായി അപമാനിച്ച് നാണം കെടുത്തുക. ഔദ്യോഗികമായും അല്ലാതെയും പല രീതിയിൽ വേട്ടയാടുക. സിപിഎം ഭരിക്കുന്ന കേരളത്തിൽ ഇതൊക്കെ പതിവായിരിക്കുകയാണ്. ഗുരുതരമായ ഈ സംഭവത്തിൻ്റെ പശ്ചാത്തലത്തിൽ പി പി ദിവ്യ ജില്ലാ പഞ്ചായത്ത് പ്രസിഡന്‍റ് സ്ഥാനം രാജി വയ്ക്കണമെന്ന് രാജീവ് ചന്ദ്രശേഖർ ആവശ്യപ്പെട്ടു. ആഭ്യന്തരം കയ്യാളുന്ന മുഖ്യമന്ത്രി പിണറായി വിജയൻ അവർക്കെതിരെ നടപടിയെടുക്കാനുള്ള ആർജ്ജവം കാണിക്കണം “- രാജീവ് ചന്ദ്രശേഖർ പ്രസ്താവനയിലൂടെ വ്യക്തമാക്കി.