സ്വകാര്യ സ്‌കൂളുകളിലെ സംവരണ സീറ്റുകളിലേക്കുള്ള പ്രവേശനം;ഓൺലൈൻ സംവിധാനവുമായി ആന്ധ്രസർക്കാർ

വിജയവാഡ: സ്വകാര്യ സ്‌കൂളുകളിലെ 25 ശതമാനം വരുന്ന സംവരണ സീറ്റുകളിലേക്കുള്ള പ്രവേശനം ഏകീകരിക്കുന്നതിന്റെ ഭാഗമായി പ്രവേശനത്തിന് ഓണ്‍ലൈന്‍ സംവിധാനമൊരുക്കി ആന്ധ്രപ്രദേശ് സര്‍ക്കാര്‍. സാമൂഹിക, സാമ്പത്തിക പശ്ചാത്തലം അടിസ്ഥാനമാക്കാതെ എല്ലാ കുട്ടികള്‍ക്കും പ്രവേശനം സാധ്യമാക്കുന്നതിന് പുതിയ സംവിധാനത്തിലൂടെ കഴിയുമെന്നാണ് സര്‍ക്കാര്‍ കരുതുന്നത്. പ്രവേശനത്തിനായി അപേക്ഷ സമർപ്പിക്കാനുള്ള സമയം ഇക്കഴിഞ്ഞ ബുധനാഴ്ച മുതൽ ആരംഭിച്ചു.ഏപ്രില്‍ 10 വരെ അപേക്ഷ സമര്‍പ്പിക്കാം

വിദ്യാഭ്യാസ അവകാശ നിയമം സെക്ഷന്‍ 12(1) (c) പ്രകാരം സ്വകാര്യ സ്‌കൂളുകളിലെ 25 ശതമാനം സീറ്റുകള്‍ സാമ്പത്തികമായും സാമൂഹികമായും പിന്നാക്കം നില്‍ക്കുന്ന കുട്ടികള്‍ക്കായി സംവരണം ചെയ്യണം എന്നാണ് വ്യവസ്ഥ. കഴിഞ്ഞ അദ്ധ്യയന വര്‍ഷമാണ് സാമ്പത്തികമായി പിന്നാക്കം നില്‍ക്കുന്ന വിദ്യാർത്ഥികൾക്കായി സ്വകാര്യ സ്‌കൂളുകളില്‍ ആന്ധ്രസര്‍ക്കാര്‍ സംവരണം നടപ്പാക്കിയത്. ശേഷം രണ്ടാം വര്‍ഷത്തിലാണ് സര്‍ക്കാര്‍ ഓണ്‍ലൈന്‍ സംവിധാനവും ഒരുക്കിയിരിക്കുന്നത്.

രാജ്യത്ത് നിരവധി സംസ്ഥാനങ്ങളില്‍ നേരത്തെ തന്നെ പദ്ധതി നടപ്പാക്കുകയും പ്രവേശനം ഓണ്‍ലൈന്‍ സംവിധാനം വഴി ഏകീകരിക്കുകയും ചെയ്തിട്ടുണ്ട്.