നെഞ്ചുലഞ്ഞ് അഫ്ഗാൻ ; സഹായത്തിനായി കേണ് താലിബാൻ ഭരണകൂടം ; ദുരന്തഭൂമിയിൽ ദുരിതം വിതച്ച് കനത്ത മഴയും

കാബൂൾ : അഫ്ഗാനിസ്താനിൽ ഉണ്ടായ ശക്തമായ ഭൂകമ്പത്തിൽ മരിച്ചവരുടെ എണ്ണം 800 കടന്നതിനിടെ രക്ഷാപ്രവർത്തനം ബുദ്ധിമുട്ടിലാക്കി കനത്ത മഴ. സൈനിക വിമാനങ്ങളും ഹെലികോപ്റ്ററുകളും ഉപയോഗിച്ചാണ് പലയിടങ്ങളിൽ നിന്നും ആളുകളെ രക്ഷപ്പെടുത്തുന്നത്. ഇതുവരെ 40 വിമാനങ്ങളിലായി 420-ഓളം പേരെ ദുരന്തബാധിത മേഖലകളിൽ നിന്ന് മാറ്റിയതായി പ്രതിരോധ മന്ത്രാലയം അറിയിച്ചു.

കുനാർ, നംഗർഹാർ പ്രവിശ്യകളിൽ മാത്രം ഇതുവരെ 812 പേർ മരിച്ചതായി താലിബാൻ ഭരണകൂട വക്താവ് സബീഹുള്ള മുജാഹിദ് അറിയിച്ചു. 2800-ൽ അധികം ആളുകൾക്ക് പരിക്കേറ്റിട്ടുണ്ട്. പ്രതികൂല കാലാവസ്ഥയും ദുർഘടമായ പ്രദേശങ്ങളും കാരണം രക്ഷാപ്രവർത്തനം ഏറെ ബുദ്ധിമുട്ടിലാണെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

റിക്ടർ സ്കെയിലിൽ ആറ് തീവ്രത രേഖപ്പെടുത്തിയ ഭൂകമ്പം അഫ്ഗാനിസ്താൻ സമീപകാലത്ത് നേരിട്ട ഏറ്റവും വലിയ പ്രകൃതിദുരന്തങ്ങളിലൊന്നാണ്. കുനാർ ഗ്രാമത്തിലെ മൂന്ന് ഗ്രാമങ്ങൾ പൂർണമായും ഇല്ലാതായെന്നാണ് റിപ്പോർട്ടുകൾ. വിദൂരമായ മലമ്പ്രദേശങ്ങളിലേക്ക് രക്ഷാപ്രവർത്തകർക്ക് ഇപ്പോഴും എത്താനായിട്ടില്ല. ഈ മേഖലകളിൽ നിരവധി വീടുകൾ തകർന്നുവീണതായി വിവരമുണ്ട്.

താലിബാൻ ഭരണം പിടിച്ചെടുത്തതിന് ശേഷം അഫ്ഗാനിസ്താൻ നേരിടുന്ന മൂന്നാമത്തെ വലിയ ഭൂകമ്പമാണിത്. 2022-ൽ ആയിരത്തോളം പേർ മരിച്ച ഭൂകമ്പം ഭരണകൂടം നേരിട്ട വലിയ വെല്ലുവിളിയായിരുന്നു. സാമ്പത്തിക പ്രതിസന്ധി നേരിടുന്ന താലിബാൻ ഭരണകൂടത്തിന് ഈ ദുരന്തം കൂടുതൽ തിരിച്ചടിയാകുമെന്നാണ് വിലയിരുത്തൽ.

അന്താരാഷ്ട്ര സഹായം തേടി താലിബാൻ ഭരണകൂടം ലോകരാഷ്ട്രങ്ങളോട് അഭ്യർഥന നടത്തിയിട്ടുണ്ട്. ഈ സാഹചര്യത്തിൽ ഇന്ത്യയും ചൈനയും ഉൾപ്പെടെയുള്ള രാജ്യങ്ങൾ സഹായം വാഗ്ദാനം ചെയ്തു. കാബൂളിലേക്ക് ആയിരം ടെന്റുകളും 15 ടൺ ഭക്ഷ്യവസ്തുക്കളും അയച്ചതായി ഇന്ത്യൻ വിദേശകാര്യ മന്ത്രി എസ്. ജയശങ്കർ അറിയിച്ചു. കൂടുതൽ സഹായം നാളെ മുതൽ അയക്കുമെന്നും അദ്ദേഹം വ്യക്തമാക്കി. ചൈനയും സഹായം നൽകാൻ തയ്യാറാണെന്ന് അറിയിച്ചിട്ടുണ്ട്. യുഎൻ സെക്രട്ടറി ജനറൽ അന്റോണിയോ ഗുട്ടെറസും സഹായ ദൗത്യത്തിന് തയ്യാറെടുക്കുന്നതായി അറിയിച്ചു.