ഹിന്ദു, ക്രിസ്ത്യൻ, മുസ്‌ലീം, പാർസി വിവാഹ നിയമങ്ങൾ ഈ ഒരൊറ്റ നിയമം ഭേദഗതി ചെയ്യും; വിവാഹപ്രായ ബിൽ പാർലമെന്ററി സമിതി പരിശോധിക്കുമ്പോൾ പിറക്കുന്നത് പുതു ചരിത്രം

രാജ്യത്ത് ലിംഗ ഭേദമില്ലാതെ വിവാഹപ്രായം 21 ആയി ഏകീകരിക്കുന്ന ശൈശവ വിവാഹ നിരോധന ഭേദഗതി നിയമം പരിഗണിക്കുമ്പോൾ പാർലമെന്ററി സമിതി ഇന്ന് രാജ്യത്ത് നിലവിലുള്ള ഏഴോളം വിവാഹ നിയമങ്ങൾ പരിശോധിക്കും. കഴിഞ്ഞ പാർലമെന്റ് സമ്മേളനത്തിലാണ് നിയമം ലോക്സഭ പാസ്സാക്കി പാർലമെന്ററി സമിതിക്ക് വിട്ടത്. ഹിന്ദു വിവാഹ നിയമം, ഇന്ത്യൻ ക്രിസ്ത്യൻ വിവാഹ നിയമം; പാഴ്സി വിവാഹ, വിവാഹമോചന നിയമം; മുസ്ലീം വ്യക്തിനിയമം (ശരിയത്ത്) അപേക്ഷാ നിയമം; പ്രത്യേക വിവാഹ നിയമവും വിദേശ വിവാഹ നിയമവും തുടങ്ങിയ നിയമങ്ങളാണ് പുതിയ ബില്ലിനനുസരിച്ച് ഭേദഗതി ചെയ്യപ്പെടുക.

രാജ്യസഭയിലെ ബിജെപി അംഗം ഡോ.വിനയ് സഹസ്രബുദ്ധെയാണ് സമിതിയുടെ അധ്യക്ഷൻ. പാർലമെന്റിന്റെ ഇരുസഭകളിൽ നിന്നുമുള്ള അംഗങ്ങളിൽ നിന്ന് 31 അംഗങ്ങളാണ് സമിതിയിലുള്ളത്. പത്ത് അംഗങ്ങൾ രാജ്യസഭയിൽ നിന്നും ബാക്കി 21 പേർ ലോക്‌സഭയിൽ നിന്നുമാണ്. ആർ.എസ്. ഭാരതി (ഡിഎംകെ), ഭുവനേശ്വർ കലിത (ബിജെപി) ഡോ എം തമ്പിദുരൈ (എഐഎഡിഎംകെ), സുസ്മിത ദേവ് (തൃണമൂൽ), രാജേന്ദ്ര അഗർവാൾ (ബിജെപിയും), സന്തോഖ് സിംഗ് ചൗധരി (കോൺഗ്രസ്), അനുഭവ് മൊഹന്തി (ബിജെഡി), ചന്ദേശ്വർ പ്രസാദ് ജെഡിയു തുടങ്ങിയവർ പാനലിലെ അംഗങ്ങളാണ്. 2020ൽ വനിതാ ശിശു വികസന മന്ത്രാലയം രൂപീകരിച്ച ജയ ജെയ്റ്റ്‌ലി കമ്മിറ്റിയുടെ ശുപാർശകളെ തുടർന്നാണ് സ്ത്രീകളുടെ നിയമപരമായ വിവാഹപ്രായം ഉയർത്തുന്നത്. 1978 മുതൽ രാജ്യത്ത് സ്ത്രീകളുടെ വിവാഹപ്രായം 18 ആയി നിശ്ചയിച്ചിരുന്നു, എന്നാൽ ഇത് വ്യക്തി നിയമങ്ങൾ കാരണം ഹിന്ദുക്കൾക്കും ക്രിസ്ത്യാനികൾക്കും മാത്രമാണ് ബാധകമായിരുന്നത്. ഈ അസമത്വമാണ് പുതിയ നിയമത്തോടെ ഇല്ലാതാക്കുക. ജനാധിപത്യത്തിൽ, സ്ത്രീകൾക്കും പുരുഷന്മാർക്കും വിവാഹബന്ധത്തിൽ പ്രവേശിക്കാൻ തുല്യാവകാശം നൽകുന്നതിൽ നമ്മൾ 75 വർഷം വൈകിയിരിക്കുന്നു എന്നാണ് കേന്ദ്രമന്ത്രി സ്‌മൃതി ഇറാനി പറഞ്ഞത്.