സംസ്ഥാന ചലച്ചിത്ര പുരസ്കാരം അട്ടിമറിച്ചെന്ന ആരോപണം; സംവിധായകൻ ലിജീഷ് മുള്ളേഴത്തിന്റെ ഹർജി ഇന്ന് ഹെെക്കോടതി പരിഗണിക്കും

കൊച്ചി: സംസ്ഥാന ചലച്ചിത്ര പുരസ്കാരം അട്ടിമറിച്ച സംഭവം ചോദ്യം ചെയ്ത് നൽകിയ ഹർജി ഹെെക്കോടതി ഇന്ന് പരിഗണിക്കും. ‘ആകാശത്തിന് താഴെ’ എന്ന ചിത്രത്തിലെ സംവിധായകൻ ലിജീഷ് മുള്ളേഴത്ത് ആണ് ഹെെക്കോടതിയിൽ ഹർജി സമർപ്പിച്ചിരിക്കുന്നത്. പുരസ്കാര നിർണയത്തിൽ ജൂറി ചെയർമാൻ ഇടപെട്ടിട്ടുണ്ടെന്നാണ് ഹർജിയിൽ ലിജീഷ് പറയുന്നത്. നേരത്തെ അന്വേഷണം ആവശ്യപ്പെട്ട് പോലീസിൽ പരാതി സമർപ്പിച്ചിരുന്നെങ്കിലും നടപടികൾ ഒന്നും ഉണ്ടാകാത്ത സാഹചര്യത്തിൽ അന്വേഷണം നടത്താൻ സംസ്ഥാന പോലീസ് മേധാവിയ്‌ക്ക് നിർദ്ദേശം നൽകാനും ഹർജിയിൽ ആവശ്യപ്പെട്ടിട്ടുണ്ട്.

ജസ്റ്റിസ് പി വി കുഞ്ഞികൃഷ്ണന്‍ അധ്യക്ഷനായ ബെഞ്ചാണ് ഇന്ന് ഹർജി പരിഗണിക്കുക. സംസ്ഥാന ചലച്ചിത്ര പുരസ്കാര പ്രഖ്യാപനത്തിൽ ആദ്യം പ്രതികരിച്ചെത്തിയത് സംവിധായകൻ വിനയൻ ആയിരുന്നു. സംഭവത്തിൽ മറ്റ് ജൂറി ആംഗങ്ങളുടെ ശബ്ദ രേഖകൾ വിനയൻ തന്നെ പുറത്തു വിട്ടിരുന്നു.