അകത്തായാൽ പുറത്താവും ! ബിൽ ലോക്‌സഭയിൽ അവതരിപ്പിച്ച് അമിത് ഷാ ;സഭ സ്തംഭിപ്പിക്കാൻ പ്രതിപക്ഷ ശ്രമം;5 മണി വരെ നിര്‍ത്തിവെച്ചു

ദില്ലി : അഞ്ചോ അതിലധികമോ വർഷം തടവ് ലഭിക്കാവുന്ന കുറ്റങ്ങളിൽ അറസ്റ്റിലായി തുടർച്ചയായി 30 ദിവസം ജയിലിൽ കഴിയുന്ന മന്ത്രിമാർക്ക് സ്ഥാനം നഷ്ടപ്പെടുത്തുന്ന ഭരണഘടനാ ഭേദഗതി ബിൽ കേന്ദ്ര ആഭ്യന്തരമന്ത്രി അമിത് ഷാ ലോക്സഭയിൽ അവതരിപ്പിച്ചു. ബിൽ അവതരിപ്പിക്കുന്നതിനിടെ സഭ സ്തംഭിപ്പിക്കാൻ പ്രതിപക്ഷം ശ്രമിച്ചത് സഭയെ ബഹളമയമാക്കി. തൃണമൂൽ അം​ഗങ്ങൾ ബിൽ കീറിയെറിഞ്ഞു. ബഹളത്തെ തുടര്‍ന്ന് സഭ 5 മണി വരെ നിര്‍ത്തിവെച്ചു. അമിത് ഷായ്ക്ക് നേരെ ബില്ലെറിഞ്ഞാണ് പ്രതിപക്ഷം പ്രതിഷേധിച്ചത്.

ഇതിനിടെ അമിത് ഷാ മുൻപ് അറസ്റ്റിലായിട്ടുണ്ടെന്നും രാജിവയ്ക്കുമോയെന്നും കെ.സി. വേണുഗോപാൽ ചോദിച്ചു. കേസെടുത്തപ്പോൾ രാജിവച്ചെന്ന് ആയിരുന്നു അമിത് ഷായുടെ മറുപടി. തന്നെ കുറ്റവിമുക്തനാക്കും വരെ ഒരു പദവിയും ഏറ്റെടുത്തില്ലെന്നും അമിത് ഷാ മറുപടി നൽകി.