അസമിൽ മൂന്നുദിവസത്തെ പര്യടനത്തിനായി കേന്ദ്രമന്ത്രി അമിത്ഷാ! ഹിമന്തസർക്കാരിന്റെ ഒന്നാം വാർഷികത്തിന് നിറമേകാൻ ആഭ്യന്തരമന്ത്രിയും

ഗുവാഹത്തി: അസമിൽ മൂന്നുദിവസത്തെ പര്യടനത്തിനായി കേന്ദ്രമന്ത്രി അമിത്ഷാ എത്തി. ഇന്നലെ രാത്രിയോടെയാണ് അദ്ദേഹം അസമിൽ എത്തിയത്. ലോക്പ്രിയ ഗോപിനാഥ് ബൊർദോലോയ് അന്താരാഷ്‌ട്ര വിമാനത്താവളത്തിൽ എത്തിയ അദ്ദേഹത്തെ മുഖ്യമന്ത്രി ഹിമന്ത ബിശ്വ ശർമ്മ സ്വാഗതം ചെയ്തു.

ഹിമന്ത ബിശ്വശർമ്മയുടെ നേതൃത്വത്തിലുള്ള സർക്കാരിന്റെ ഒന്നാം വാർഷികത്തിന്റെ ഭാഗമായായിരുന്നു അമിത് ഷാ അസമിൽ എത്തിയത്. വാർഷികാഘോഷ പരിപാടികളിൽ പങ്കെടുക്കുന്ന അദ്ദേഹം സർക്കാരിന്റെ വിവധ പദ്ധതികളും ഉദ്ഘാടനം ചെയ്യും. നാളെയാണ് അസമിൽ ബിജെപി സർക്കാർ അധികാരത്തിലേറി ഒരു വർഷം പൂർത്തിയാകുന്നത്.

നാളെ ഗുവാഹത്തിയിൽ സംഘടിപ്പിക്കുന്ന റാലിയിൽ അമിത് ഷാ ജനങ്ങളെ അഭിസംബോധനയും ചെയ്യും ഇതിന് ശേഷം സൂപ്പർസ്‌പെഷ്യാലിറ്റി ആശുപത്രിയുൾപ്പെടെ വിവിധ പദ്ധതികൾ ഉദ്ഘാടനം നടത്തും. ഇതിന് ശേഷം സർക്കാരിന്റെ വിവിധ നിർമ്മാണ പദ്ധതികൾക്ക് അദ്ദേഹം തറക്കല്ലിടൽ കർമ്മം നിർവ്വഹിക്കും. പൊതു ഓഡിറ്റോറിയങ്ങൾ, ഇന്റഗ്രേറ്റഡ് ഡിസി ഓഫീസ്, പോലീസ് കമ്മീഷണറേറ്റ് ബിൽഡിംഗ്, ഗുവാഹത്തി പോലീസ് റിസെർവ് ഭവൻ എന്നിവയുടെ നിർമ്മാണമാണ് സർക്കാർ നടപ്പിലാക്കാൻ പോകുന്നത്.