പുഷ്പ 2 ആൾക്കൂട്ട ദുരന്തം ! കുറ്റപത്രം സമർപ്പിച്ച് ചിക്കടപ്പള്ളി പോലീസ്; അല്ലു അർജുൻ പതിനൊന്നാം പ്രതി

ഹൈദരാബാദ് : ‘പുഷ്പ 2’ സിനിമയുടെ പ്രീമിയർ പ്രദർശനത്തിനിടെ ഹൈദരാബാദിലെ സന്ധ്യ തിയേറ്ററിലുണ്ടായ തിക്കും തിരക്കും തുടർന്നുണ്ടായ അപകടത്തിൽ ചിക്കടപ്പള്ളി പോലീസ് കുറ്റപത്രം സമർപ്പിച്ചു. തിയേറ്റർ മാനേജ്‌മെന്റിന്റെ ഭാഗത്തുനിന്നുണ്ടായ ഗുരുതരമായ വീഴ്ചയാണ് അപകടത്തിന് പ്രധാന കാരണമെന്ന് ചൂണ്ടിക്കാട്ടുന്ന കുറ്റപത്രത്തിൽ 23 പേരെയാണ് പ്രതിപ്പട്ടികയിൽ ഉൾപ്പെടുത്തിയിരിക്കുന്നത്. ഈ കേസിൽ സിനിമയിലെ നായകനായ അല്ലു അർജുൻ പതിനൊന്നാം പ്രതിയാണ് (A11). തിയേറ്റർ മാനേജ്‌മെന്റിനെ ഒന്നാം പ്രതിയായും (A1) കുറ്റപത്രത്തിൽ രേഖപ്പെടുത്തിയിട്ടുണ്ട്.

തിയേറ്റർ മാനേജർമാർ, സുരക്ഷാ ചുമതലയിലുണ്ടായിരുന്ന ബൗൺസർമാർ എന്നിവരുൾപ്പെടെയുള്ളവരാണ് പ്രതിപ്പട്ടികയിലുള്ള മറ്റുള്ളവർ. 2024 ഡിസംബർ മൂന്നിന് രാത്രി നടന്ന പ്രീമിയർ പ്രദർശനത്തിനിടെയാണ് വൻ ജനക്കൂട്ടം നിയന്ത്രണാതീതമായി തിരക്ക് കൂട്ടിയത്. ഈ അപകടത്തിൽ രേവതി എന്ന പ്രാദേശിക നിവാസിക്ക് ജീവൻ നഷ്ടമാവുകയും അവരുടെ മകൻ ശ്രീതേജിന് ഗുരുതരമായി പരിക്കേൽക്കുകയും ചെയ്തിരുന്നു. അപകടത്തിന് പിന്നാലെ അല്ലു അർജുനെ പോലീസ് അറസ്റ്റ് ചെയ്യുകയും അദ്ദേഹം ജുഡീഷ്യൽ കസ്റ്റഡിയിൽ കഴിയുകയും ചെയ്തിരുന്നു.

പോലീസ് ശേഖരിച്ച തെളിവുകളുടെയും നാല് ദൃക്‌സാക്ഷികളുടെ മൊഴികളുടെയും അടിസ്ഥാനത്തിലാണ് കുറ്റപത്രം തയ്യാറാക്കിയിരിക്കുന്നത്. മതിയായ സുരക്ഷാ ക്രമീകരണങ്ങൾ ഒരുക്കാതെയും ജനക്കൂട്ടത്തെ നിയന്ത്രിക്കാൻ പരാജയപ്പെട്ടതും തിയേറ്റർ മാനേജ്‌മെന്റിന് തിരിച്ചടിയായി. സംഭവത്തെക്കുറിച്ചുള്ള വിശദമായ അന്വേഷണം ഇപ്പോഴും തുടരുകയാണെന്നും അധികൃതർ വ്യക്തമാക്കി.