അമൃത ആയുർവേദ & നാചുറോപതിക് ഹോസ്പിറ്റൽ തിരുവനന്തപുരത്ത് പ്രവർത്തനമാരംഭിച്ചു

അരുവിക്കര: ഭാരതത്തിൻ്റെ തനതായ ചികിത്സാശാസ്ത്രമായ ആയുർവേദവും ജീവൽ ശക്തി എന്ന വിശ്വാസത്തെ അടിസ്ഥാനപ്പെടുത്തിയുള്ള സമാന്തര ചികിത്സാ സമ്പ്രദായമായ പ്രകൃതി ചികിത്സയും സാധാരണക്കാരിലേക്ക് എത്തിക്കാനായി തിരുവനന്തപുരം മലയടി വിനോബാനികേതനിൽ മാതാ അമൃതാനന്ദയി മഠത്തിനു കീഴിൽ അമൃത ആയുർവേദ & നാച്യുറോപതിക് ഹോസ്പിറ്റൽ എന്ന സ്ഥാപനം പ്രവർത്തനം ആരംഭിച്ചു.

അരുവിക്കര നിയോജക മണ്ഡലം എം എൽ എ അഡ്വക്കേറ്റ് ജി സ്ററീഫൻ ഉത്ഘാടനകർമ്മം നിർവഹിച്ച ചടങ്ങിൽ കൈമനം മാതാ അമൃതാനന്ദയി മഠം മഠാധിപതി സ്വാമി ശിവാമൃതാനന്ദപുരി ഭദ്രദീപം തെളിച്ചു. ആയുർവേദവും പ്രകൃതി ചികിത്സയും സാധാരണക്കാരിലേക്ക് എത്തിക്കാൻ ഇത്തരം സംരംഭങ്ങൾ മാതാ അമൃതാനന്ദമയി മഠം ഏറ്റെടുത്തു നടത്തുന്നത് ശ്ലാഘനീയമാണെന്നും ഇതിന്റെ പ്രവർത്തനങ്ങൾ ഉത്തരോത്തരം ഉയരങ്ങളിലേക്ക് എത്തട്ടെ എന്നും ഉദ്ഘാടന പ്രസംഗത്തിൽ അഡ്വ ജി സ്റ്റീഫൻ എം എൽ എ പറഞ്ഞു.

ചടങ്ങിൽ തൊളിക്കോട് പഞ്ചായത്ത് പ്രസിഡന്റ് അഡ്വ. വി ജെ സുരേഷ് , സ്റ്റാൻഡിംഗ് കമ്മിറ്റി മെമ്പർ ലിജുകുമാർ , വാർഡ് മെമ്പർ മാരായ വേണുഗോപാലൻ നായർ , വിനിതമോൾ, എസ് സി ബി പ്രസിഡൻ്റ് പ്രേംകുമാർ , ആർ എസ് പി അരുവിക്കര മണ്ഡലം സെക്രട്ടറി ശശി , ബി ജെ പി മണ്ഡലം പ്രസിഡൻ്റ് വിനോബാ ജയൻ , കോൺഗ്രസ്സ് ബ്ലോക്ക് പ്രസിഡൻ്റ് പുഷ്പാംഗദൻ എന്നിവരും പങ്കെടുത്തു.