രാമായണകഥയെ അടിസ്ഥാനമാക്കിയൊരു പരസ്യം ! സൈബറിടത്ത് തരംഗം തീർത്ത് ശ്രീലങ്കൻ എയർലൈൻസ് !

കൊളംബോ : വിനോദ സഞ്ചാരികളെ മാടി വിളിച്ചുകൊണ്ട് രാമായണകഥയെ അടിസ്ഥാനമാക്കി ശ്രീലങ്കൻ എയർലൈൻസ് അണിയിച്ചൊരുക്കിയ പരസ്യം സൈബറിടത്ത് തരംഗമാകുന്നു. ശ്രീലങ്കയെ ലോക വിനോദസഞ്ചാര ഭൂപടത്തിൽ അടയാളപ്പെടുത്തുക എന്ന ലക്ഷ്യത്തോടെയാണ് പരസ്യം ഒരുക്കിയിരിക്കുന്നത് .

രാമായണത്തിൽ പരാമർശിച്ചിരിക്കുന്ന സ്ഥലങ്ങൾ സഞ്ചാരികൾക്ക് സന്ദർശിക്കാനാകുമെന്നാണ് പരസ്യത്തിൽ പറയുന്നത്. രാമായണത്തിൽ പറയുന്ന സ്ഥലങ്ങളെ പറ്റിയും, രാമായണക്കഥയും മുത്തശ്ശി കൊച്ചുമകനോട് വിവരിക്കുന്ന രീതിയിലാണ് പരസ്യം ഒരുക്കിയിരിക്കുന്നത്. രാവണ ഗുഹ, അശോക വാടി തുടങ്ങീ രാമായണത്തിൽ പരാമർശിച്ചിരിക്കുന്ന ശ്രീലങ്കയിലെ എല്ലാ പുണ്യസ്ഥലങ്ങളെയും പരസ്യത്തിൽ കാണിക്കുന്നുണ്ട് .

രാവണൻ സീതയെ തട്ടിക്കൊണ്ടുപോയ സംഭവം , പുഷ്പകവിമാനം , അശോക വാടി, സീതയെ കണ്ടെത്താൻ ഹനുമാന്റെ ലങ്കയിലേക്കുള്ള യാത്ര, ഹനുമാന്റെ ലങ്കാ ദഹനം , രാമസേതുവിന്റെ നിർമ്മാണം , രാവണവധം ,രാവണൻ ശിവനെ പ്രാർത്ഥിച്ച സ്ഥലത്ത് ശ്രീരാമൻ ശിവലിംഗം സ്ഥാപിച്ചത് തുടങ്ങിയ കാര്യങ്ങളും പരസ്യത്തിൽ പറയുന്നുണ്ട്.