ആഴ്ചയില്‍ ഒരു അവധി. പോലീസ് സേനയ്ക്ക് മാനുഷിക നീതി ലഭിയ്ക്കുന്ന ഉത്തരവ്, എ.ഡി.ജി.പി പി. വിജയന്റെ ഈ നിര്‍ദ്ദേശം ആശ്വാസമാകുന്നത് പൊലീസ് ഉദ്യോഗസ്ഥരുടെ കുടുംബങ്ങള്‍ക്കും

സംസ്ഥാനത്തെ പോലീസ് സേനയ്ക്ക് ആശ്വാസമേകുന്ന ഉത്തരവാണ് ക്രമസമാധാന വിഭാഗം എ.ഡി.ജി.പി പി. വിജയന്‍ പുറത്തിറക്കിയത്. സംസ്ഥാനത്തെ പൊലീസ് ഉദ്യോഗസ്ഥര്‍ക്ക് ആഴ്ചയില്‍ ഒരു ദിവസം നിര്‍ബന്ധിത അവധി എന്നത് സേനയ്ക്ക് വലിയ മാനുഷിക നീതി ലഭിയ്ക്കുന്ന ഉത്തരവ് കൂടിയാണ്. ഉദ്യോഗസ്ഥരുടെ ജോലി ഭാരത്തോടൊപ്പമുള്ള മാനസിക സമ്മര്‍ദ്ദത്തിന് അയവ് വരുത്താന്‍ ഈ ഉത്തരവ് ഒരു മുതല്‍ക്കൂട്ട് തന്നെയാണ്.

അടിയന്തര സേവനങ്ങളുടെ സ്വഭാവം പരിഗണിച്ച് എല്ലാവര്‍ക്കും കൃത്യമായി അവധി ലഭിക്കുന്നുണ്ടെന്ന് ജില്ലാ പൊലീസ് മേധാവികള്‍ ഉറപ്പുവരുത്തണമെന്നും നിര്‍ദേശത്തില്‍ പറയുന്നു. പൊലീസുകാരുടെ ഓരോ ആഴ്ചയിലെയും അവധി മുന്‍കൂട്ടി തന്നെ ഡ്യൂട്ടി രജിസ്റ്ററില്‍ രേഖപ്പെടുത്തണം. പൊലീസ് ഉദ്യോഗസ്ഥര്‍ക്ക് കുടുംബത്തോടൊപ്പം സമയം ചെലവഴിക്കാനും വ്യക്തിപരമായ ആവശ്യങ്ങള്‍ പൂര്‍ത്തീകരിക്കാനും ആവശ്യത്തിന് സമയം ലഭിക്കുന്നുണ്ടെന്ന് ഉറപ്പാക്കണമെന്നും നിര്‍ദേശത്തില്‍ വ്യക്തമാക്കുന്നു. കുടുംബത്തോടൊപ്പമുള്ള പല വിശേഷ ദിവസങ്ങള്‍ പോലും സേനയിലുള്ളവര്‍ക്ക് അനുവദനീയമല്ലായിരുന്നു. ഇതിനാണ് ഇപ്പോള്‍ പരിഹാരം കണ്ടിരിയ്ക്കുന്നത്.

കുടുംബവുമായി ബന്ധപ്പെട്ട പ്രധാനപ്പെട്ട അവസരങ്ങളില്‍ ഉദ്യോഗസ്ഥര്‍ക്ക് അവധി അനുവദിക്കണമെന്നുള്ള നിര്‍ദ്ദേശം അതുകൊണ്ടു തന്നെ വളരെ പ്രധാനപ്പെട്ട കാര്യവുമാണ്. വളരെ അടിയന്തരവും അത്യന്താപേക്ഷിതവുമായ സാഹചര്യങ്ങളില്ലെങ്കില്‍ ഉദ്യോഗസ്ഥര്‍ക്ക് അര്‍ഹതപ്പെട്ട ആ ആഴ്ചയിലെ അവധി നിഷേധിക്കാന്‍ പാടില്ലെന്നും എഡിജിപി സര്‍ക്കുലറില്‍ എടുത്തു പറയുന്നുണ്ട്. ചുരുക്കി പറഞ്ഞാല്‍ പൊലീസ് സേനയ്ക്ക് മാത്രമല്ല അവരുടെ കുടുംബങ്ങള്‍ക്കും അത്യന്തികം ആശ്വാസം നല്‍കുന്ന ഉത്തരവാണ് ഇപ്പോള്‍ പുറത്ത് വന്നിരിയ്ക്കുന്നത്.