ഭാര്യ വാഹനത്തിൽനിന്ന് ഇറങ്ങിപ്പോയതിന്റെ ദേഷ്യം തീർത്തത് വാഹനം അമിതവേഗത്തിൽ പറപ്പിച്ച്!!!; 2 പേർ കൊല്ലപ്പെട്ട അപകടത്തിൽ ഡ്രൈവർക്കായി തിരച്ചിൽ

വർക്കലയിൽ ഉത്സവം കഴിഞ്ഞു മടങ്ങുന്നവർക്കിടയിലേക്ക് റിക്കവറി വാഹനം ഇടിച്ചുകയറി അമ്മയും മകളും കൊല്ലപ്പെട്ട സംഭവത്തിൽ വാഹനത്തിന്റെ ഡ്രൈവർക്കായി തിരച്ചിൽ ശക്തമാക്കി പോലീസ്. ഇന്നലെ രാത്രി പത്തരയോടെ വർക്കല– ആറ്റിങ്ങൽ റോഡിൽ കൂട്ടിക്കട ഭാഗത്തുവച്ചായിരുന്നു അപകടം. പേരേറ്റിൽ സ്വദേശികളായ രോഹിണി, മകൾ അഖില എന്നിവരാണ് മരിച്ചത്. വർക്കലയിൽനിന്നു കവലയൂർ ഭാഗത്തേക്ക് പോയ റിക്കവറി വാഹനമാണ് അമിതവേഗത്തിൽ ആൾക്കൂട്ടത്തിനിടയിലേക്ക് ഇടിച്ചുകയറിയത്.അപകടത്തിനു പിന്നാലെ മദ്യലഹരിയിലായിരുന്ന ഡ്രൈവർ വാഹനത്തിൽനിന്ന് ഇറങ്ങിയോടി.അപകടത്തിനു തൊട്ടുമുൻപ് സ്കൂട്ടറിൽ വന്ന ഒരു യുവാവിനെയും ഒരു കാറിലും വാഹനം ഇടിച്ചിരുന്നെന്നു നാട്ടുകാർ പറഞ്ഞു.
0

അപകടം നടക്കുന്നതിനു മുൻപ് മറ്റൊരു ജംക്‌ഷനിൽ വച്ച് മറ്റൊരാളുമായി ഡ്രൈവർ വഴക്കിട്ടിരുന്നെന്നും ഇതിനു ശേഷം ഇയാളുടെ ഭാര്യ വാഹനത്തിൽനിന്ന് ഇറങ്ങി പോയെന്നും ഒരു നാട്ടുകാരൻ പറഞ്ഞു. ഇതിന്റെ ദേഷ്യത്തിലാണ് വാഹനം അമിതവേഗത്തിൽ ഓടിച്ചു വന്നതെന്നും നാട്ടുകാരൻ പറഞ്ഞു.