സ്വരലയ സ്കൂൾ ഓഫ് മ്യൂസിക് സെലിബ്രേഷൻ മൂന്നാം വാർഷികം – സ്വരക്ഷര’24 നെതർലാൻഡ്സ്ൽ വിപുലമായി ആഘോഷിച്ചു

അൽമേരെ, നെതർലാൻഡ്‌സ് : സ്വരലയ സ്കൂൾ ഓഫ് മ്യൂസിക്കിൻ്റെ മൂന്നാം വാർഷിക ദിനാഘോഷം സ്വരക്ഷര’24 എന്ന പേരിൽ ഡിസംബർ 7 ശനിയാഴ്ച അൽമേറിലെ പ്രശസ്തമായ കുൻസ്റ്റ്ലിനി തിയേറ്ററിൽ വെച്ച് നടന്നു. 800 ഓളം കുട്ടികളും അവരുടെ രക്ഷിതാക്കളും പങ്കെടുത്ത വിപുലമായ ചടങ്ങു പ്രതിഭകളുടെയും സാമൂഹിക സമന്വയത്തിന്റെയും ഉജ്ജ്വലമായ സമ്മേളനമായി മാറി.

ഇന്ത്യൻ എംബസിയുടെ പ്രതിനിധിയും കോൺസുലർ ഇൻ ചാർജ്ജും ആയ രാജേഷ് കുമാർ ഉൾപ്പെടെയുള്ള പ്രമുഖരായ പ്രതിനിധികൾ പരിപാടിയിൽ പങ്കെടുത്തു. വിവിധ കമ്മ്യൂണിറ്റി സംഘടനകളിൽ നിന്നുള്ള നേതാക്കൾ, വനിതാ സംരംഭക കൗൺസിലുകളുടെ മേധാവികൾ, മറ്റ് സാമൂഹ്യ സാംസ്കാരിക പ്രമുഖർ എന്നിവരും പങ്കെടുത്തു. കല്യാൺ ഗ്രൂപ്പ്, അഞ്ജപ്പർ, കൈലാഷ് പർബത്ത് തുടങ്ങിയ പ്രമുഖ റസ്റ്റോറൻ്റ് ശൃംഖലകൾ ഉൾപ്പെടെ നിരവധി സ്പോൺസർമാരുടെ പിന്തുണയോടെയാണ് ആഘോഷം സാധ്യമാക്കിയത്.സംഗീതത്തിൽ അഗാധമായ അഭിനിവേശമുള്ള ദമ്പതികളായ രാമകൃഷ്ണനും വന്ദനയും ചേർന്ന് അഞ്ച് വർഷം മുമ്പാണ് സ്വരലയ സ്കൂൾ ഓഫ് മ്യൂസിക് സ്ഥാപിച്ചത് .

കർണാടിക് – ഹിന്ദുസ്ഥാനി സംഗീതങ്ങളിൽ പരിചയസമ്പന്നരായ ഇരുവരും, സമാന താൽപ്പര്യങ്ങൾ പങ്കിടുന്ന മറ്റുള്ളവർക്കും , പുതു തലമുറയ്ക്കും ശാസ്ത്രീയ സംഗീതത്തോടുള്ള അവരുടെ അറിവും സ്നേഹവും പ്രചരിപ്പിക്കുക എന്ന ദൗത്യവുമായി ആണ് ഈ സ്കൂൾ സ്ഥാപിച്ചത്.നെതർലാൻഡ്‌സിലെ ഏറ്റവും വലിയ ദക്ഷിണേന്ത്യൻ സംഗീത വിദ്യാലയമായി അംഗീകരിക്കപ്പെട്ട സ്വരലയ തങ്ങളുടെ വിദ്യാർത്ഥികളുടെ സംഗീത നേട്ടങ്ങൾ ആഘോഷിക്കുന്നതിനും സമൂഹത്തെ ഒന്നിപ്പിക്കുന്നതിനുമായി എല്ലാ വർഷവും ഈ ഉത്സവം സംഘടിപ്പിക്കുന്നു.

സ്വരലയ സ്കൂൾ ഓഫ് മ്യൂസിക്കിനെയും അതിൻ്റെ സ്ഥാപകരെയും അവരുടെ ദൗത്യത്തെയും കുറിച്ചുള്ള കൂടുതൽ വിവരങ്ങൾക്ക് swaralayaschoolofmusic.nl എന്ന അവരുടെ ഔദ്യോഗിക വെബ്സൈറ്റ് സന്ദർശിക്കാം