പ്രസംഗം തീർന്നെന്ന് കരുതി അനൗൺസ്‌മെന്റ്; മുഖ്യമന്ത്രി ക്ഷുഭിതനായി, വേദിയിൽ നിന്ന് പിണങ്ങി ഇറങ്ങിപ്പോയി

കാസർകോട്: പൊതുപരിപാടിയിൽ നിന്നും ക്ഷുഭിതനായി പിണങ്ങിയിറങ്ങി മുഖ്യമന്ത്രി പിണറായി വിജയൻ. പ്രസംഗം തീർന്നെന്ന് കരുതി അനൗൺസ്‌മെന്റ് നടത്തിയതിനെ തുടർന്നാണ് മുഖ്യമന്ത്രി ആക്രോശിച്ച് ഇറങ്ങി പോയത്. കാസർകോട് ബേഡഡുക്ക സർവീസ് സഹകരണ ബാങ്ക് ഉദ്ഘാടന ചടങ്ങിനെത്തിയതായിരുന്നു മുഖ്യമന്ത്രി. തന്റെ പ്രസംഗം അവസാനിപ്പിക്കുന്നുവെന്ന് പറഞ്ഞതിന് തൊട്ടുപിന്നാലെ തന്നെ അനൗൺസ്‌മെന്റ് തുടങ്ങി.

തന്റെ പ്രസംഗം അവസാനിപ്പിക്കുന്നുവെന്ന് മുഖ്യമന്ത്രി പറഞ്ഞെങ്കിലും വീണ്ടും എന്തോ പറയാനായി തുടങ്ങിയതിനിടെയാണ് അനൗൺസ്‌മെന്റ് നടത്തിയത്. തുടർന്ന് പ്രകോപിതനായ മുഖ്യമന്ത്രി പരിപാടിയിൽ നിന്നും ഇറങ്ങിപോവുകയായിരുന്നു.

അനൗൺസ് ചെയ്യുന്നയാൾക്ക് ചെവി കേൾക്കില്ലേയെന്നും മുഖ്യമന്ത്രി മൈക്കിലൂടെ പറയുന്നുണ്ടായിരുന്നു. അതിന് ശേഷം സംഘാടകരിലൊരാൾ അദ്ദേഹത്തെ തടഞ്ഞതിന് പിന്നാലെ അനൗൺസ്‌മെന്റ് നിർത്തി. പിന്നാലെ പ്രസംഗപീഠത്തിന് പിന്നിൽ നിന്നയാളോട് ശരിയായ നടപടി അല്ലെന്നും പിണറായി പറഞ്ഞു.