ആറന്മുള വള്ളസദ്യയും അഞ്ചമ്പല ദർശനവും !! ഭക്തർക്കായി മഹാഭാരത തീർത്ഥയാത്ര അവതരിപ്പിച്ച് കെഎസ്ആർടിസി

ആറന്മുള വള്ളസദ്യയും അഞ്ചമ്പല ദർശനവും ഉൾക്കൊള്ളിച്ച് കെഎസ്ആർടിസിയുടെ തീർത്ഥാടന പാക്കേജ്. മഹാഭാരത തീർത്ഥയാത്ര എന്ന പേരിലാകും ഭക്തർക്കായി ഈ പാക്കേജ് കെഎസ്ആർടിസി അവതരിപ്പിക്കുന്നത്.

ദേവസ്വം ബോർഡിന്റെയും, കെഎസ്ആർടിസിയുടെയും, പഞ്ച ദിവ്യ ദേശ ദർശന്റെയും സംയുക്ത യോഗത്തിലാണ് ഇക്കാര്യത്തിൽ അന്തിമ തീരുമാനമുണ്ടായത്. ജൂലൈ 21മുതൽ ഒക്ടോബർ 2 വരെയാണ് ആറന്മുളയിൽ വള്ളസദ്യ  നടക്കുന്നത്. ജൂലൈ 28ന് കെഎസ്ആർടിസി തീർത്ഥാടനത്തിന് ക്ഷേത്രങ്ങളിൽ വിപുലമായ സ്വീകരണം നൽകും. 

ആറന്മുളയിലെ വള്ള സദ്യയ്ക്ക് എത്തുന്നവർ പഞ്ചപാണ്ഡവ ക്ഷേത്രങ്ങളായ തൃചിറ്റാറ്റ്, തൃപ്പുലിയൂർ, തിരുവറന്മുള, തിരുവൻ വണ്ടൂർ, തൃക്കൊടിത്താനം, കൂടാതെ പാണ്ഡവർ കാവ്, മുതുകുളം കുന്തി ദേവി ക്ഷേത്രം എന്നിങ്ങനെ ക്ഷേത്രദർശനവും നടത്തുകയാണ് പതിവ്.

ക്ഷേത്രങ്ങളുടെ അടിസ്ഥാന സൗകര്യങ്ങൾ ഉൾപ്പടെ വിലയിരുത്തുന്നതിനയുള്ള സംയുക്ത യോഗം ആറന്മുള പള്ളിയോട സേവാ സംഘം പ്രസിഡന്റ് സാമ്പദേവൻ കെ വി ഉദ്‌ഘാടനം ചെയ്തു. പഞ്ച ദിവ്യ ദേശ ദർശൻ ചെയർമാൻ ബി രാധാകൃഷ്ണമേനോൻ അദ്ധ്യക്ഷത വഹിച്ചു.കെഎസ്ആർടി സംസ്ഥാന കോർഡിനേറ്റർ ആർ സുനിൽ കുമാർ, ജില്ലാ കോർഡിനേറ്റർ സന്തോഷ്‌ കുമാർ സി, ആറന്മുള അസി. കമ്മീഷണർ ആർ. രേവതി, ആറന്മുള എ ഒ ഈശ്വരൻ നമ്പൂതിരി, ചെങ്ങന്നൂർ എ ഒ പി ആർ മീര, തിരുവൻ വണ്ടൂർ എ സി മുരളി, എസ് ജി ഒ അനിത, തൃക്കൊടി ത്താനം എസ് ജി ഒ അരുൺ എ, പള്ളിയോട സേവാ സംഘം സെക്രട്ടറി പ്രസാദ് ആനന്ദ് ഭവൻ, മധു സൂദനൻ ജി, ആർ ഡി രാജീവ്‌, സജികുമാർ തിനപ്പറമ്പിൽ,
തുടങ്ങിയവർ പങ്കെടുത്തു.