അരവണ പ്രതിസന്ധിയ്ക്ക് താൽക്കാലിക പരിഹാരം; പ്രസാദ വിതരണത്തിലെ നിയന്ത്രണങ്ങളിൽ അയവ്; കണ്ടെയ്നറുകൾ എത്തിക്കുന്നതിൽ വീഴ്ച വരുത്തിയ കമ്പനിക്കെതിരെ നിയമനടപടിയെടുക്കും

ശബരിമല: സന്നിധാനത്തെ അരവണ പ്രസാദ വിതരണത്തിലെ പ്രതിസന്ധിയ്ക്ക് താൽക്കാലിക പരിഹാരം. അടിയന്തിരമായി 50000 കണ്ടെയ്നറുകൾ എത്തിച്ചതോടെയാണ് പ്രതിസന്ധിയ്ക്ക് പരിഹാരമായത്. എന്നാൽ അത് പര്യാപ്തമല്ല. കൂടുതൽ അരവണ ടിന്നുകൾ ഉടൻ എത്തിക്കുമെന്ന് ദേവസ്വം ബോർഡ് അറിയിച്ചിട്ടുണ്ട്. ഒരാൾക്ക് 10 ടിന്നുകൾ വരെ അരവണ നിലവിൽ നൽകുന്നുണ്ട്. മകരവിളക്ക് അടുത്ത് വരുന്നതോടെ ശബരിമലയിൽ തിരക്കേറുകയാണ്. വരുന്ന പത്താം തീയതി മുതൽ സ്പോട്ട് ബുക്കിംഗ് നിർത്തിവയ്ക്കുന്നത് ഉൾപ്പെടെയുള്ള നിയന്ത്രണങ്ങൾ ഉണ്ടാകുമെന്ന് ബോർഡ് നേരത്തെ അറിയിച്ചിരുന്നു.

ശർക്കര ക്ഷമമായിരുന്നു ഈ സീസണിൽ അരവണ വിതരണത്തിൽ ആദ്യം പ്രതിസന്ധിയുണ്ടാക്കിയത്. അത് പരിഹരിച്ചതോടെ കണ്ടെയ്നർ ക്ഷാമം ഉണ്ടാകുകയായിരുന്നു. ആവശ്യത്തിന് കണ്ടെയ്നറുകൾ എത്തിക്കാൻ കരാർ നൽകിയിരുന്നത് 2 കമ്പനികൾക്കായിരുന്നു. ഇതിൽ ഒരു കമ്പനിയാണ് കണ്ടെയ്നറുകൾ നൽകുന്നതിൽ വീഴ്ച വരുത്തിയത്. പ്രസ്തുത കമ്പനിക്കെതിരെ നിയമ നടപടികൾ സ്വീകരിക്കുമെന്ന് ദേവസ്വം ബോർഡ് അറിയിച്ചു.