വാക്കുതർക്കം ; പിന്നാലെ ശ്രീക്കുട്ടിയെ ട്രെയിനിൽ നിന്ന് ചവിട്ടി പുറത്തേക്ക് തള്ളിയിട്ടു;വര്‍ക്കലയിലെ അതിക്രമത്തിന്റെ സിസിടിവി ദൃശ്യങ്ങൾ പുറത്ത്

തിരുവനന്തപുരം : വര്‍ക്കലയില്‍ ഓടുന്ന ട്രെയിനിൽ നിന്ന് പെൺകുട്ടിയെ യുവതിയെ ചവിട്ടി പുറത്തേക്കിടുന്ന സിസിടിവി ദൃശ്യങ്ങൾ പുറത്ത്. കേസിൽ പിടിയിലായിരുന്ന സുരേഷ് തന്നെയാണ് ശ്രീക്കുട്ടിയെ പുറത്തേക്ക് ചവിട്ടി തള്ളിയിടുന്നത്. ആര്‍പിഎഫ് അന്വേഷണസംഘത്തിന് സിസിടിവി ദൃശ്യങ്ങള്‍ കൈമാറി. സുരേഷും, ശ്രീക്കുട്ടിയും തമ്മില്‍ വാക്കുതര്‍ക്കം ഉണ്ടായതായി സിസിടിവി ദൃശ്യങ്ങളില്‍ വ്യക്തമാണെന്ന് പോലീസ് വൃത്തങ്ങള്‍ അറിയിച്ചു.

ഞായറാഴ്ച രാത്രി 8.45-ഓടെ വര്‍ക്കല അയന്തിക്ക് സമീപത്തായിരുന്നു തിരുവനന്തപുരം പാലോട് സ്വദേശിനി ശ്രീക്കുട്ടി നേരെ അതിക്രമമുണ്ടായത്. ശൗചാലയത്തില്‍നിന്ന് വരുമ്പോളാണ് ശ്രീക്കുട്ടിയെയും സുഹൃത്തായ അർച്ചനയേയും തിരുവനന്തപുരം പനച്ചമൂട് വടക്കുംകര വീട്ടില്‍ സുരേഷ് കുമാര്‍ ആക്രമിച്ചത്. എന്നാല്‍, അര്‍ച്ചന വാതിലിന്റെ കമ്പനിയില്‍ പിടിച്ചുതൂങ്ങി. ഉടന്‍തന്നെ മറ്റുയാത്രക്കാര്‍ ഓടിയെത്തി അര്‍ച്ചനയെ ട്രെയിനിനുള്ളിലേക്ക് വലിച്ചുകയറ്റുകയായിരുന്നു.

മദ്യലഹരിയിലായിരുന്നു തന്റെ പ്രവൃത്തിയെന്ന് ഇയാള്‍ സമ്മതിച്ചിട്ടുണ്ട്. എന്നാല്‍, ഇടയ്ക്കിടയ്ക്ക് ഇയാള്‍ മൊഴി മാറ്റിപ്പറയുന്നുമുണ്ട്. ഈ സാഹചര്യത്തലാണ് ഇയാളുടെ പങ്ക് സ്ഥിരീകരിക്കുന്ന സിസിടിവി ദൃശ്യങ്ങള്‍ അന്വേഷണ സംഘത്തിന് ലഭിച്ചിരിക്കുന്നത്. സുരേഷ് കുമാറിന്റെ പേരില്‍ വധശ്രമത്തിന് കേസെടുത്തിട്ടുണ്ട്.