ഡ്രഡ്ജറിന്റെ ചെലവ് എങ്ങനെ വഹിക്കും എന്നതില്‍ അവ്യക്തത !അർജുൻ ദൗത്യം അനിശ്ചിതത്വത്തിൽ ; ദൗത്യം തുടരുന്നതിൽ തീരുമാനമെടുക്കാന്‍ കര്‍ണാടക സര്‍ക്കാരിനോട് ആവശ്യപ്പെട്ട് ജില്ലാ ഭരണകൂടം

ബംഗളൂരു: കണ്ണൂരിലെ ഷിരൂരിലുണ്ടായ മണ്ണിടിച്ചിലില്‍ കാണാതായ മലയാളി ട്രക്ക് ഡ്രൈവർ അര്‍ജുനായുള്ള തെരച്ചിലില്‍ അനിശ്ചിതത്വം. പുഴയുടെ അടിത്തട്ടിൽ നിന്നും മണ്ണ് നീക്കം ചെയ്യുന്ന ഡ്രഡ്ജര്‍ ഗോവയിൽ നിന്ന് എത്തിക്കാതെ ഇനി ദൗത്യം തുടരാനാകില്ല. ഇതിന് ഒരാഴ്ചയോളം സമയമെടുക്കുമെന്നാണ് കരുതുന്നത്. എന്നാൽ ഡ്രഡ്ജറിന്റെ ചെലവ് എങ്ങനെ വഹിക്കും എന്നതില്‍ അവ്യക്തത നിലനില്‍ക്കുകയാണ്.

ദൗത്യം ഇനിയും മുന്നോട്ട് പോകണമോ എന്ന കാര്യത്തില്‍ തീരുമാനം എടുക്കാന്‍ കര്‍ണാടക സര്‍ക്കാരിനോട് ആവശ്യപ്പെട്ടിരിക്കുകയാണ് ഉത്തര കന്നഡ ജില്ലാ ഭരണകൂടം. രാവിലെ ചേര്‍ന്ന ഉന്നതതല യോഗത്തിലാണ് വിഷയം സംസ്ഥാന സര്‍ക്കാരിന് കൈമാറാന്‍ തീരുമാനമായത്. ഡ്രഡ്ജറിന്റെ ചെലവ് കണക്കുകള്‍ വ്യക്തമാക്കി ഉത്തര കന്നഡ ജില്ലാ കലക്ടര്‍ കര്‍ണാടക പ്രിന്‍സിപ്പല്‍ സെക്രട്ടറിക്ക് കത്ത് കൈമാറും. ഒരു കോടി രൂപയ്ക്ക് അടുത്താണ് ഡ്രജര്‍ എത്തിക്കാനുള്ള ചെലവായി കണക്കാക്കുന്നത്. അതേസമയം ഒഴുക്ക് ശക്തമായതോടെ ഗംഗാവലി പുഴയിലെ തെരച്ചില്‍ താല്‍ക്കാലികമായി നിര്‍ത്തി വച്ചിരിക്കുകയാണ്.