ഭീകരരുമായുള്ള ഏറ്റുമുട്ടൽ സൈന്യത്തിന്റെ നായയായ സൂമിന് ഗുരുതര പരിക്ക്; ആശുപത്രിയിൽ ചികിത്സയിൽ, പ്രാർത്ഥനകളോടെ ഇന്ത്യൻ ആർമി

കശ്മീർ: ഭീകരരുമായുള്ള ഏറ്റുമുട്ടലിനിടയിൽ ഇന്ത്യൻ സൈന്യത്തിന്റെ നായയായ സൂമിന് ഗുരുതരമായി പരിക്കേറ്റു. ശ്രീനഗറിലെ ആർമി വെറ്ററിനറി ആശുപത്രിയിൽ ഇപ്പോൾ ചികിത്സയിലാണ് സൂം. ഓപ്പറേഷൻ തങ്പവാസ് കോംബാറ്റ് ടീമിന്റെ ഭാഗമായിരുന്നു സൂം. കശ്മീരിലെ അനന്ത്‌നാഗ് ജില്ലയിൽ സൈന്യം ഭീകരർക്കായി നടത്തിയ തിരച്ചിലിനിടയിലായിരുന്നു സൂമിന് പരിക്കേറ്റത്.

ആർമി ചിനാർ കോർപ്‌സാണ് സൂമിന് പരിക്കേറ്റ വിവരം പുറത്ത് വിട്ടത്. സൂം എത്രയും വേഗം സുഖം പ്രാപിക്കട്ടെ എന്നും അവർ ട്വീറ്റ് ചെയ്തു. ‘ഭീകരരെ നേരിടാനുള്ള ഓപ്പറേഷനിടെയാണ് സൂമിന് ഗുരുതരമായി പരിക്കേറ്റത്. അവർ ആർമിയുടെ വെറ്ററിനറി ആശുപത്രിയിൽ ചികിത്സയിലാണ്. സൂം വേഗത്തിൽ സുഖം പ്രാപിക്കട്ടെ എന്നാണ് പ്രാർത്ഥിക്കുന്നതെന്നും’ ട്വിറ്ററിൽ കുറിച്ചു.

അനന്ത്‌നാഗ് ജില്ലയിലെ കൊക്കർനാഗിലുള്ള തങ്പവ ഗ്രാമത്തിൽ കഴിഞ്ഞ ദിവസം രാത്രി സുരക്ഷാ സേനയും ഭീകരരും തമ്മിൽ ഏറ്റുമുട്ടലുണ്ടായി. ഇന്നലെ രണ്ട് ഭീകരരെയാണ് സൈന്യം വധിച്ചത്. മേഖലയിൽ ഒരു ഭീകരൻ കൂടി ഒളിച്ചിരിക്കുന്നതായാണ് വിവരം. ഇയാൾക്ക് വേണ്ടിയുള്ള തിരച്ചിലിലാണ് സൈന്യം.