“വോട്ട് ചോദിക്കുക വികസനത്തിന്റെ പേരിൽ! ബിജെപിയുടെ ലക്ഷ്യം ഉപതെരഞ്ഞെടുപ്പിനു ശേഷം 53 വർഷം പുതുപ്പള്ളി കാണാത്ത വികസനമെത്തിക്കുക”; പുതുപ്പള്ളി പിടിക്കാനൊരുങ്ങി ലിജിൻ ലാൽ

ദില്ലി : മുൻ മുഖ്യമന്ത്രി ഉമ്മൻ ചാണ്ടിയുടെ നിര്യാണത്തെ തുടർന്ന് ഒഴിവ് വന്ന പുതുപ്പള്ളി നിയമസഭാ മണ്ഡലത്തിൽ, സെപ്റ്റംബർ അഞ്ചിന് നടക്കുന്ന ഉപതെരഞ്ഞെടുപ്പിനുള്ള ബിജെപി സ്ഥാനാർത്ഥിയായി തെരഞ്ഞെടുക്കപ്പെട്ട ശേഷമുള്ള ആദ്യ പ്രതികരണം നടത്തി ബിജെപി കോട്ടയം ജില്ലാ പ്രസിഡൻറ് ജി.ലിജിൻലാൽ.സ്ഥാനാർത്ഥി പ്രഖ്യാപനത്തിനു ശേഷം ബിജെപി ജില്ലാ കമ്മിറ്റി ഓഫിസിൽ എത്തിയ ലിജിൻ ലാലിനെ പാർട്ടി പ്രവർത്തകരും നേതാക്കളും ചേർന്ന് സ്വീകരണം നൽകി.

പാർട്ടി ഏൽപ്പിച്ച ദൗത്യത്തിൽ സന്തോഷമുണ്ടെന്നും വികസനത്തിന്റെ പേരിൽ വോട്ടു ചോദിക്കുമെന്നും 53 വർഷം പുതുപ്പള്ളി കാണാത്ത വികസനം ഉപതിരഞ്ഞെടുപ്പിനു ശേഷം എത്തിക്കുകയാണു ബിജെപിയുടെ ലക്ഷ്യമെന്നും ജി.ലിജിൻലാൽ പറഞ്ഞു.

കഴിഞ്ഞ നിയമസഭാ തെരഞ്ഞെടുപ്പില്‍ കടുത്തുരുത്തി മണ്ഡലത്തില്‍ നിന്ന് അദ്ദേഹം ജനവിധി തേടിയിരുന്നു. യുവമോർച്ച ജില്ലാ പ്രസിഡന്റ്, ജനറൽ സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്. കോവിഡ് കാലത്തു ജില്ലയിൽ ബിജെപി നടത്തിയ സന്നദ്ധ പ്രവർത്തനങ്ങളുടെ ചുമതല വഹിച്ചു. കയറ്റുമതി ബിസിനസ് ചെയ്യുകയാണ് ലിജിൻ.

പുതുപ്പള്ളിയിൽ ഉപതിരഞ്ഞെടുപ്പ് പ്രഖ്യാപിച്ചതിനു പിന്നാലെ മണിക്കൂറുകൾക്കുള്ളിൽ യുഡിഎഫ് ചാണ്ടി ഉമ്മനെ സ്ഥാനാർഥിയായി പ്രഖ്യാപിച്ചിരുന്നു.ജെയ്ക് സി.തോമസാണ് എൽഡിഎഫ് സ്ഥാനാർത്ഥിയാകുന്നത്. പുതുപ്പള്ളിയിൽ ജെയ്ക് സി തോമസിന് ഇത് മൂന്നാം അങ്കമാണ്. ബിജെപി കൂടി സ്ഥാനാർത്ഥി പ്രഖ്യാപനം നടത്തിയതോടെ പുതുപ്പള്ളി ഉപതിരഞ്ഞെടുപ്പിനുള്ള മത്സരാർഥികളുടെ പൂർണ ചിത്രം തെളിഞ്ഞു.സെപ്റ്റംബർ എട്ടിനാണ് വോട്ടെണ്ണൽ.