ഗ്രീൻലാൻഡ് പിടിച്ചെടുക്കാൻ ട്രമ്പിന്റെ നീക്കം: ദിവാസ്വപ്നം മാത്രമെന്ന് പ്രധാനമന്ത്രി ജെൻസ് ഫ്രെഡറിക് നീൽസൺ!! അസംബന്ധമെന്ന് ഡെന്മാർക്ക്

വാഷിംഗ്ടൺ : ആർട്ടിക് മേഖലയിലെ തന്ത്രപ്രധാന ദ്വീപായ ഗ്രീൻലാൻഡ് അമേരിക്കയുടെ ഭാഗമാക്കുമെന്ന പ്രസിഡന്റ് ഡൊണാൾഡ് ട്രമ്പിന്റെ പ്രസ്താവനയിൽ അതൃപ്തി പരസ്യമാക്കി ഡെന്മാർക്ക്. ദേശീയ സുരക്ഷ മുൻനിർത്തി ഗ്രീൻലാൻഡ് അമേരിക്കയ്ക്ക് ആവശ്യമാണെന്നും പ്രതിരോധ ആവശ്യങ്ങൾക്കും ധാതുസമ്പത്തിനും ഈ പ്രദേശം അത്യന്താപേക്ഷിതമാണെന്നും ട്രമ്പ് മാദ്ധ്യമപ്രവർത്തകരോട് പറഞ്ഞിരുന്നു. നിലവിൽ ഡെന്മാർക്കിന്റെ ഭാഗമാണ് ഈ സ്വയംഭരണ പ്രദേശം. ഇത്തരം ഭീഷണികൾ അവസാനിപ്പിക്കണമെന്നും ഗ്രീൻലാൻഡ് അമേരിക്കയ്ക്ക് കീഴിലാകുമെന്നത് വെറും ദിവാസ്വപ്നം മാത്രമാണെന്നും ഗ്രീൻലാൻഡ് പ്രധാനമന്ത്രി ജെൻസ് ഫ്രെഡറിക് നീൽസൺ വ്യക്തമാക്കി.

അന്താരാഷ്ട്ര നിയമങ്ങൾ മാനിക്കണമെന്നും ഇത്തരം അധിനിവേശ മോഹങ്ങൾ അംഗീകരിക്കാനാവില്ലെന്നും വ്യക്തമാക്കിയ നീൽസൺ, ചർച്ചകൾക്ക് തയ്യാറാണെങ്കിലും അത് മര്യാദയുടെ പരിധി ലംഘിച്ചാകരുത് എന്ന് ഓർമ്മിപ്പിച്ചു. ഡൊനിഷ് സാമ്രാജ്യത്തിന്റെ ഭാഗമായ ഒരു പ്രദേശവും പിടിച്ചെടുക്കാൻ അമേരിക്കയ്ക്ക് അവകാശമില്ലെന്ന് ഡെന്മാർക്ക് പ്രധാനമന്ത്രി മെറ്റെ ഫ്രെഡറിക്സണും ആവർത്തിച്ചു. ഗ്രീൻലാൻഡ് നാറ്റോ സഖ്യത്തിന്റെ ഭാഗമാണെന്നും നിലവിൽ തന്നെ പ്രതിരോധ കരാറുകൾ പ്രകാരം അമേരിക്കയ്ക്ക് അവിടെ സൗകര്യങ്ങൾ ഒരുക്കിയിട്ടുണ്ടെന്നും അവർ കൂട്ടിച്ചേർത്തു. ട്രമ്പിന്റെ അടുത്ത അനുയായി സ്റ്റീഫൻ മില്ലറുടെ ഭാര്യ കാറ്റി മില്ലർ, ഗ്രീൻലാൻഡിനെ അമേരിക്കൻ പതാകയുടെ നിറത്തിൽ ചിത്രീകരിച്ചുകൊണ്ട് SOON എന്ന് സമൂഹ മാദ്ധ്യമത്തിൽ കുറിച്ചതാണ് പുതിയ വിവാദങ്ങൾക്ക് തിരികൊളുത്തിയത്.

വെനസ്വേലയിൽ കഴിഞ്ഞ ദിവസം നടന്ന സൈനിക നീക്കത്തിലൂടെ പ്രസിഡന്റ് നിക്കോളാസ് മഡുറോയെ പുറത്താക്കി ന്യൂയോർക്കിലേക്ക് മാറ്റിയതിന് പിന്നാലെയാണ് ട്രമ്പിന്റെ ഗ്രീൻലാൻഡ് പ്രസ്താവന വരുന്നത് എന്നത് ലോകരാജ്യങ്ങളെ ആശങ്കയിലാക്കുന്നുണ്ട്. ഗ്രീൻലാൻഡ് പിടിച്ചെടുക്കാൻ അമേരിക്ക സൈനിക ബലം പ്രയോഗിച്ചേക്കുമോ എന്ന ഭയവും നിലനിൽക്കുന്നു. ഗ്രീൻലാൻഡിലെ ധാതുസമ്പത്ത് അമേരിക്കൻ ഹൈടെക് വ്യവസായങ്ങൾക്ക് വലിയ ഗുണം ചെയ്യുമെന്നാണ് ട്രമ്പ് ഭരണകൂടത്തിന്റെ വിലയിരുത്തൽ. ഇതിനായി ഗ്രീൻലാൻഡിലേക്ക് ഒരു പ്രത്യേക പ്രതിനിധിയെ നിയോഗിക്കാനുള്ള അമേരിക്കൻ നീക്കം ഡെന്മാർക്കിനെ പ്രകോപിപ്പിച്ചിരുന്നു.

ഏകദേശം 57,000 മാത്രം ജനസംഖ്യയുള്ള ഗ്രീൻലാൻഡ് 1979 മുതൽ സ്വയംഭരണാധികാരത്തിലുള്ള പ്രദേശമാണ്. വിദേശനയവും പ്രതിരോധവും മാത്രമാണ് ഡെന്മാർക്ക് നേരിട്ട് കൈകാര്യം ചെയ്യുന്നത്. ഗ്രീൻലാൻഡിലെ ഭൂരിഭാഗം ജനങ്ങളും ഡെന്മാർക്കിൽ നിന്ന് പൂർണ്ണ സ്വാതന്ത്ര്യം ആഗ്രഹിക്കുന്നവരാണെങ്കിലും, അമേരിക്കയുടെ ഭാഗമാകാൻ അവർക്ക് ഒട്ടും താല്പര്യമില്ലെന്നാണ് സമീപകാല സർവ്വേകൾ സൂചിപ്പിക്കുന്നത്. നയതന്ത്ര മര്യാദകൾ ലംഘിച്ചുള്ള ട്രമ്പിന്റെ ഈ നീക്കം യൂറോപ്യൻ രാജ്യങ്ങളും അമേരിക്കയും തമ്മിലുള്ള ബന്ധത്തിൽ വിള്ളൽ വീഴ്ത്താൻ സാധ്യതയുണ്ടെന്നാണ് രാഷ്ട്രീയ നിരീക്ഷകർ കരുതുന്നത്.