കൊച്ചിയിൽ നവജാതശിശുവിനെ തട്ടുകടയിൽ ഉപേക്ഷിക്കാൻ ശ്രമം; അമ്മയും സുഹൃത്തും പോലീസ് കസ്റ്റഡിയിൽ

മരട്* എറണാകുളം കുണ്ടന്നൂരിൽ നവജാതശിശുവിനെ വഴിയരികിലെ തട്ടുകടയിൽ ഉപേക്ഷിക്കാൻ ശ്രമിച്ച സംഭവത്തിൽ അമ്മയും സുഹൃത്തും പോലീസ് കസ്റ്റഡിയിലായി. ഇടുക്കി ഉടുമ്പൻചോല സ്വദേശിനി അഞ്ജു, ഇവരുടെ സുഹൃത്തായ തൃപ്പൂണിത്തുറ പുതിയകാവ് സ്വദേശി മിഥുൻ എന്നിവരെയാണ് പോലീസ് കസ്റ്റഡിയിലെടുത്തത്. ഞായറാഴ്ച പുലർച്ചെ ഒരു മണിയോടെ കുണ്ടന്നൂർ ഫോറം മാളിന് സമീപമുള്ള സർവീസ് റോഡിലെ തട്ടുകടയിലാണ് സംഭവം നടന്നത്. ശനിയാഴ്ച വെളുപ്പിനെ പ്രസവിച്ച ആൺകുഞ്ഞിനെയാണ് ഉപേക്ഷിക്കാൻ ശ്രമിച്ചത്. നിലവിൽ എറണാകുളം ജനറൽ ആശുപത്രിയിൽ പ്രവേശിപ്പിച്ച കുഞ്ഞിന്റെ ആരോഗ്യനില തൃപ്തികരമാണ്.

കുഞ്ഞിനെ തട്ടുകടയിൽ ഉപേക്ഷിക്കപ്പെട്ട നിലയിൽ കണ്ടെത്തിയെന്ന് കാണിച്ച് മിഥുൻ തന്നെയാണ് ആദ്യം പോലീസ് കൺട്രോൾ റൂമിൽ വിവരമറിയിച്ചത്. എറണാകുളത്തുനിന്ന് വീട്ടിലേക്ക് മടങ്ങുന്നതിനിടെ ചായ കുടിക്കാൻ തട്ടുകടയിൽ കയറിയപ്പോൾ കുഞ്ഞിന്റെ കരച്ചിൽ കേൾക്കുകയായിരുന്നുവെന്നാണ് ഇയാൾ പോലീസിനോട് ആദ്യം പറഞ്ഞിരുന്നത്. ദേഹമാസകലം കൊതുകുകടിയേറ്റ നിലയിൽ ബെഞ്ചിൽ തുണിയിൽ പൊതിഞ്ഞ നിലയിലായിരുന്നു കുഞ്ഞെന്നും സമീപത്ത് തെരുവുനായ്ക്കൾ ഉണ്ടായിരുന്നുവെന്നും ഇയാൾ പോലീസിനെ ധരിപ്പിച്ചു. വിവരമറിഞ്ഞ് അരമണിക്കൂറിനകം സ്ഥലത്തെത്തിയ പോലീസ് കുഞ്ഞിനെ ഉടൻ തന്നെ സമീപത്തെ സ്വകാര്യ ആശുപത്രിയിലും പിന്നീട് ജനറൽ ആശുപത്രിയിലെ അമ്മത്തൊട്ടിലിലേക്കും മാറ്റി.

തുടർന്ന് മിഥുന്റെ മൊഴിയിൽ സംശയം തോന്നിയ പോലീസ് ഇയാളെ വീണ്ടും വിളിച്ചുവരുത്തി വിശദമായി ചോദ്യം ചെയ്തപ്പോഴാണ് സംഭവത്തിന്റെ യഥാർത്ഥ ചുരുളഴിഞ്ഞത്. വളർത്താൻ സാഹചര്യമില്ലാത്തതിനാലും എന്നാൽ കുഞ്ഞ് സുരക്ഷിതമായി സംരക്ഷിക്കപ്പെടണമെന്ന ആഗ്രഹത്താലുമാണ് ഇങ്ങനെ ചെയ്തതെന്നാണ് യുവതി പോലീസിന് നൽകിയ മൊഴി. കുഞ്ഞിനെ തട്ടുകടയിൽ കൊണ്ടുപോയി കിടത്തിയ ശേഷം പോലീസിൽ വിവരമറിയിക്കാൻ അഞ്ജു സുഹൃത്തായ മിഥുന്റെ സഹായം തേടുകയായിരുന്നു. പദ്ധതിപ്രകാരമാണ് മിഥുൻ പോലീസിനെ വിളിച്ചതെന്ന് വ്യക്തമായതോടെ രണ്ടുപേരെയും പോലീസ് കസ്റ്റഡിയിലെടുത്തു. നിലവിൽ ആശുപത്രിയിൽ പ്രവേശിപ്പിച്ചിരിക്കുന്ന യുവതിയുടെ അറസ്റ്റ് വൈകാതെ രേഖപ്പെടുത്തുമെന്ന് മരട് പോലീസ് അറിയിച്ചു.