ലഡാക്കിലെ ഹിമപാതം: മരണം ഏഴായി; വിനോദ സഞ്ചാരികളുടെ വാഹനങ്ങൾക്ക് മേൽ നിമിഷനേരം കൊണ്ട് പതിച്ചത് ടൺ കണക്കിന് മഞ്ഞ്

ലേ : ലഡാക്കിലെ സോജില പാസിന് സമീപം ദയാൽ സ്ലൈഡ് സോണിലുണ്ടായ ഹിമപാതത്തിൽ മരണം ഏഴായി. ഇന്നലെ ഉച്ചയോടെയുണ്ടായ അപകടത്തിൽ അഞ്ച് പേർക്ക് ഗുരുതരമായി പരിക്കേറ്റതായാണ് ഔദ്യോഗിക വിവരം. മലനിരകളിൽ നിന്ന് അതിവേഗത്തിൽ മഞ്ഞ് ഇടിഞ്ഞുവീഴുന്നതിന്റെ ഭയാനകമായ ദൃശ്യങ്ങൾ പുറത്തുവന്നിട്ടുണ്ട്. ഇടുങ്ങിയ പാതയിലൂടെ നീങ്ങുകയായിരുന്ന വാഹനങ്ങൾക്ക് മേൽ നിമിഷനേരം കൊണ്ട് ടൺ കണക്കിന് മഞ്ഞ് വന്നുവീഴുകയായിരുന്നു.

സംഭവത്തെത്തുടർന്ന് ലഡാക്ക് ലഫ്റ്റനന്റ് ഗവർണർ വിനയ് കുമാർ സക്സേന അടിയന്തര രക്ഷാപ്രവർത്തനത്തിന് ഉത്തരവിട്ടു. കാർഗിൽ ഡെപ്യൂട്ടി കമ്മീഷണറോടും സീനിയർ സൂപ്രണ്ടിനോടും നേരിട്ട് സ്ഥലത്തെത്തി പ്രവർത്തനങ്ങൾ ഏകോപിപ്പിക്കാൻ അദ്ദേഹം നിർദ്ദേശം നൽകി. ദുരന്തനിവാരണ സേനയും ബോർഡർ റോഡ്‌സ് ഓർഗനൈസേഷനും (BRO) സ്ഥലത്തെത്തി മഞ്ഞിനടിയിൽപ്പെട്ടവർക്കായി തിരച്ചിൽ തുടരുകയാണ്. ലഫ്റ്റനന്റ് ഗവർണർ നേരിട്ടാണ് നിലവിലെ സ്ഥിതിഗതികൾ വിലയിരുത്തുന്നത്.

കേന്ദ്രമന്ത്രി ജിതേന്ദ്ര സിംഗ് അപകടത്തിൽ അനുശോചനം രേഖപ്പെടുത്തുകയും പരിക്കേറ്റവർക്ക് മികച്ച ചികിത്സ ഉറപ്പാക്കാൻ നിർദ്ദേശിക്കുകയും ചെയ്തു. അപകടസ്ഥലത്ത് കുടുങ്ങിക്കിടക്കുന്നവരെ പുറത്തെടുക്കാനുള്ള ശ്രമങ്ങൾ യുദ്ധകാലാടിസ്ഥാനത്തിൽ നടക്കുകയാണ്. മോശം കാലാവസ്ഥ രക്ഷാപ്രവർത്തനത്തിന് വെല്ലുവിളി ഉയർത്തുന്നുണ്ടെങ്കിലും എല്ലാ സർക്കാർ സംവിധാനങ്ങളും അതീവ ജാഗ്രതയിലാണെന്ന് അധികൃതർ അറിയിച്ചു.