അബുദാബിയിൽ വീണ്ടും ഇറാന്റെ മിസൈൽ ആക്രമണം ! 5 ഇന്ത്യക്കാർക്ക് പരിക്ക്

അബുദാബി : ഗൾഫ് രാജ്യങ്ങളിൽ ആക്രമണം വീണ്ടും ശക്തമാക്കി ഇറാൻ. അബുദാബിയിലെ ഖലീഫ ഇക്കണോമിക് സോണിൽ തകർന്നു വീണ ബാലസ്റ്റിക് മിസൈൽ അവശിഷ്ടങ്ങൾ പതിച്ച് അഞ്ച് ഇന്ത്യക്കാർക്ക് പരിക്കേറ്റു. യുഎഇയുടെ വ്യോമ പ്രതിരോധ സംവിധാനം മിസൈൽ തടയുന്നതിനിടെയാണ് അവശിഷ്ടങ്ങൾ വ്യവസായ മേഖലയിൽ വീണത്. പരിക്കേറ്റവർക്ക് ആവശ്യമായ ചികിത്സ ലഭ്യമാക്കുന്നുണ്ടെന്നും നിലവിൽ ആശങ്കപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി.

അതേസമയം, ഇറാന്റെ ആണവ പദ്ധതികൾക്ക് കനത്ത തിരിച്ചടി നൽകിക്കൊണ്ട് ഇസ്രായേൽ വ്യോമസേന വെള്ളിയാഴ്ച രാത്രി ഇറാനിലെ പ്രധാന ആണവനിലയങ്ങളിൽ ആക്രമണം നടത്തി. അരാക്കിലെ ഹെവി വാട്ടർ പ്ലാന്റും യസ്‌ദിലെ യുറേനിയം സംസ്കരണ ശാലയുമാണ് ഇസ്രായേൽ ലക്ഷ്യമിട്ടത്. ഇറാന്റെ ആണവായുധ മോഹങ്ങൾ തകർക്കുക എന്ന ലക്ഷ്യത്തോടെയാണ് ഈ നീക്കമെന്ന് ഇസ്രായേൽ പ്രതിരോധ മന്ത്രാലയം അറിയിച്ചു. ഇതിന് തിരിച്ചടിയായി സൗദി അറേബ്യയിലെ പ്രിൻസ് സുൽത്താൻ എയർബേസിന് നേരെ ഇറാൻ മിസൈൽ ആക്രമണം നടത്തി. ഈ ആക്രമണത്തിൽ കുറഞ്ഞത് 12 അമേരിക്കൻ സൈനികർക്ക് പരിക്കേറ്റതായും രണ്ട് പേരുടെ നില ഗുരുതരമാണെന്നും റിപ്പോർട്ടുകളുണ്ട്. നിരവധി അമേരിക്കൻ ഇന്ധന വിമാനങ്ങൾക്കും ആക്രമണത്തിൽ നാശനഷ്ടങ്ങൾ സംഭവിച്ചിട്ടുണ്ട്.

എന്നാൽ, മനുഷ്യത്വപരമായ പരിഗണന മുൻനിർത്തി ഹോർമുസ് കടലിടുക്കിലൂടെ ഭക്ഷ്യവസ്തുക്കളും വളവും അടങ്ങിയ കപ്പലുകൾ കടന്നുപോകാൻ അനുവദിക്കുമെന്ന് ഇറാൻ ഐക്യരാഷ്ട്രസഭയെ അറിയിച്ചു. ലോകത്തിലെ ആകെ എണ്ണക്കടത്തിന്റെ അഞ്ചിലൊന്ന് ഭാഗവും ഹോർമുസ് വഴിയാണ് നടക്കുന്നത് എന്നതിനാൽ ഇറാന്റെ ഈ തീരുമാനം ആഗോള വിപണിക്ക് നേരിയ ആശ്വാസം നൽകുന്നുണ്ട്. യുദ്ധം അവസാനിപ്പിക്കാൻ അമേരിക്കൻ പ്രസിഡന്റ് ഡൊണാൾഡ് ട്രമ്പ് ഇറാനുമായി ചർച്ചകൾക്ക് ശ്രമിക്കുന്നതായും റിപ്പോർട്ടുകൾ സൂചിപ്പിക്കുന്നു.