ഇമ്രാനെതിരെ ബിലാവൽ ഭൂട്ടോ; ‘ഇമ്രാൻ ഖാൻ പാക് ജനാധിപത്യത്തിന്റെ ഘാതകൻ, അയാൾക്ക് കശ്മീരിലെ ജനാധിപത്യത്തെ കുറിച്ച് പറയാൻ എന്തവകാശം?

ഇസ്ലാമാബാദ്: കശ്മീർ വിഷയത്തെ ദേശീയ- അന്തർദ്ദേശീയ തലങ്ങളിൽ ഉയർത്തി കൊണ്ടു വരാൻ ശ്രമിച്ച് പരാജയപ്പെട്ടു നിൽക്കുന്ന പാകിസ്ഥാൻ പ്രധാനമന്ത്രി ഇമ്രാൻ ഖാനെതിരെ രൂക്ഷ വിമർശനവുമായി ബേനസീര്‍ ഭൂട്ടോയുടെ മകന്‍ ബിലാവൽ ഭൂട്ടോ. കശ്മീരിനെക്കുറിച്ച് സംസാരിക്കാൻ ഇമ്രാന് യാതൊരുവിധ അവകാശവുമില്ലെന്നാണ് ബിലാവലിന്‍റെ വിമർശനം.

കശ്മീർ പിടിച്ചെടുക്കുന്നത് പോയിട്ട് ഉള്ള പാക് അധീന കശ്മീർ കൂടി ഇമ്രാൻ ഖാൻ നഷ്ടപ്പെടുത്തുമെന്നും ബിലാവൽ ഭൂട്ടോ പരിഹസിക്കുന്നു. നേരത്തെ ശ്രീനഗർ എങ്ങനെ തിരിച്ചു പിടിക്കാമെന്നതായിരുന്നു പാക് രാഷ്ട്രീയ വൃത്തങ്ങളിലെ ചർച്ച. എന്നാൽ ഇന്ന് മുസാഫറാബാദ് എങ്ങനെ സംരക്ഷിക്കണമെന്നാണ് പാകിസ്ഥാൻ ആശങ്കപ്പെടുന്നതെന്നും ബിലാവൽ ഭൂട്ടോ വാർത്താസമ്മേളനത്തിൽ പറഞ്ഞു. പാകിസ്ഥാനിൽ ജനാധിപത്യത്തെ കശാപ്പ് ചെയ്ത ഇമ്രാൻ ഖാന് കശ്മീരിലെ ജനാധിപത്യത്തെ കുറിച്ച് സംസാരിക്കാൻ അവകാശമില്ലെന്നും ബിലാവൽ ഭൂട്ടോ വ്യക്തമാക്കി.

മുൻ പാകിസ്ഥാൻ പ്രസിഡന്‍റായിരുന്ന തന്റെ പിതാവ് ആസിഫ് അലി സർദാരിയെ വധിക്കാൻ ഇമ്രാൻ ഖാൻ ഗൂഢാലോചന നടത്തിയതായും ബിലാവൽ ആരോപിക്കുന്നു. പാകിസ്ഥാനിലെ ദയനീയമായ സാമ്പത്തിക സ്ഥിതിക്ക് കാരണം ഇമ്രാൻ ഖാന്‍റെ ബാലിശമായ രാഷ്ട്രീയ നയങ്ങളാണ്. ഇനിയെങ്കിലും പക്വതയോടെ പെരുമാറാൻ ഇമ്രാൻ തയ്യാറായില്ലെങ്കിൽ പാകിസ്ഥാൻ യാചകരുടെ തലസ്ഥാനമായി മാറുമെന്നും ബിലാവൽ പറഞ്ഞു.

ഇമ്രാൻ ഖാനെതിരെ മുൻ പാകിസ്ഥാൻ പ്രധാനമന്ത്രി നവാസ് ഷെരീഫിന്‍റെ മകളും രംഗത്ത് വന്നു. ഇമ്രാൻ ഖാൻ പാകിസ്ഥാനെ വിൽപ്പനക്ക് വെച്ചിരിക്കുകയാണെന്നും അദ്ദേഹം പാകിസ്ഥാൻ സൈന്യത്തിന്‍റെ കൈയ്യിലെ പാവയാണെന്നും മറിയം നവാസ് ആരോപിച്ചു.

ഇന്ത്യ കശ്മീരിലെ ആർട്ടിക്കിൾ-370 റദ്ദാക്കിയതിന് ശേഷം ദേശീയ- അന്തർദ്ദേശീയ തലത്തിൽ ഒറ്റപ്പെട്ടിരിക്കുകയാണ് ഇമ്രാൻ ഖാൻ. പ്രതിപക്ഷത്തെ യുവനേതാക്കളുടെ വിമർശനങ്ങൾക്ക് മറുപടി പറയാൻ പോലും വാക്കുകളില്ലാത്ത അവസ്ഥയിലാണ് മുൻ ക്രിക്കറ്റ് താരം കൂടിയായ പാക് പ്രധാനമന്ത്രി.