ഛത്തീസ്ഗഡിൽ തെരഞ്ഞെടുപ്പ് പ്രചാരണത്തിനിടെ ബിജെപി നേതാവ് കൊല്ലപ്പെട്ടു; പിന്നിൽ മാവോയിസ്റ്റുകളെന്ന് പോലീസ്; കൊലപാതകം നിയമസഭാ തെരഞ്ഞെടുപ്പിന്റെ ആദ്യഘട്ട വോട്ടെടുപ്പിന് മൂന്ന് ദിവസങ്ങൾ മാത്രം ശേഷിക്കെ

റായ്‌പൂർ : നിയമസഭാ തെരഞ്ഞെടുപ്പിന്റെ ആദ്യഘട്ട വോട്ടെടുപ്പിന് മൂന്ന് ദിവസങ്ങൾ മാത്രം അവശേഷിക്കെ ഛത്തീസ്ഗഡിൽ തെരഞ്ഞെടുപ്പ് പ്രചാരണത്തിനിടെ ബിജെപി നേതാവ് കൊല്ലപ്പെട്ടു. നാരായൺപുർ മണ്ഡലത്തിലാണ് സംഭവം.ബിജെപി നാരായൺപൂർ ജില്ലാ ഘടകത്തിന്റെ ഉപാധ്യക്ഷനും ഏരിയാ അസംബ്ലി കൺവീനറുമായിരുന്ന രത്തൻ ദുബെയാണ് കൊല്ലപ്പെട്ടത്. സംഭവത്തിനു പിന്നിൽ മാവോയിസ്റ്റുകളാണെന്നാണ് സംശയം.

ഇന്ന് വൈകുന്നേരം കൗശൽനർ മാർക്കറ്റ് പ്രദേശത്തുവച്ച് ദുബെയെ അജ്ഞാതർ വെടിവച്ചു കൊല്ലുകയായിരുന്നുവെന്നാണ് വിവരം. അദ്ദേഹത്തെ മൂർച്ചയേറിയ ആയുധം ഉപയോഗിച്ച് കൊലപ്പെടുത്തുകയായിരുന്നു എന്ന രീതിയിലുള്ള റിപ്പോർട്ടുകളും വരുന്നുണ്ട് . മാവോയിസ്റ്റുകളാണ് സംഭവത്തിനു പിന്നിലെന്ന് സംശയിക്കുന്നതായി ബസ്‌തർ റേഞ്ച് ഐജി പി.സുന്ദർരാജ് വ്യക്തമാക്കി. സംഭവസ്ഥലത്ത് ഉന്നത പോലീസ് ഉദ്യോഗസ്ഥർ ക്യാംപ് ചെയ്യുകയാണ്. പ്രധാനമന്ത്രി നരേന്ദ്ര മോദിയുടെ പരിപാടിക്കെതിരെ രണ്ടു ദിവസം മുൻപ് മാവോയിസ്റ്റുകൾ ലഘുലേഖകൾ പുറത്തിറക്കിയിരുന്നു.

കഴിഞ്ഞ മാസം 22 ന് ബിജെപിയുടെ തെരഞ്ഞെടുപ്പ് പ്രചരണത്തിനു ചുക്കാന്‍ പിടിച്ചിരുന്ന ഛത്തീസ്ഗഡിലെ പ്രമുഖ ഗ്രോത്ര നേതാവ് ബിര്‍ജു തരാമിനെ അജ്ഞാതര്‍ വെടിവച്ചു കൊന്നിരുന്നു . ഇടതു ഭീകരരായ മാവോയിസ്റ്റുകള്‍ക്ക് സ്വാധീനമുള്ള മോഹ്‌ല-മാന്‍പുര്‍ ജില്ലയിലെ മുതിര്‍ന്ന ബിജെപി നേതാവായിരുന്നു അദ്ദേഹം. ബിർജുവിന്റെ കൊലപാതകത്തിനു പിന്നിലും മാവോയിസ്റ്റുകളാണെന്നായിരുന്നു പോലീസ് നിഗമനം.

സര്‍ക്കേഡ ഗ്രാമത്തിലെ ക്ഷേത്രത്തില്‍ ദര്‍ശനം നടത്തി പാര്‍ട്ടി പ്രവര്‍ത്തകര്‍ക്കൊപ്പം മടങ്ങുമ്പോള്‍ മോട്ടോര്‍ ബൈക്കിലെത്തിയ അജ്ഞാതര്‍ ബിര്‍ജുവിനു നേരെ നിറയൊഴിക്കുകയായിരുന്നു