ബംഗാളിലും അസമിലും ബിജെപി തരംഗം! എക്സിറ്റ് പോൾ ഫലങ്ങളിൽ നിൽക്കക്കളിയില്ലാതെ കോൺഗ്രസും തൃണമൂലും

ദില്ലി : പശ്ചിമ ബംഗാളിലും അസമിലും പുറത്തുവന്ന എക്സിറ്റ് പോൾ പ്രവചനങ്ങൾ ദേശീയ രാഷ്ട്രീയത്തിൽ വലിയ ചർച്ചകൾക്ക് വഴിവെക്കുന്നു. ബംഗാളിൽ ബിജെപി അട്ടിമറി വിജയം നേടുമെന്ന മിക്ക സർവേ ഫലങ്ങളും രാഷ്ട്രീയ കേന്ദ്രങ്ങളെ ഞെട്ടിച്ചിരിക്കുകയാണ്. തൃണമൂൽ കോൺഗ്രസിന്റെ സീറ്റുകൾ കാര്യമായി കുറയുമെന്ന് അനുകൂല സർവേകൾ പോലും സൂചിപ്പിക്കുന്നുണ്ടെങ്കിലും, ഈ പ്രവചനങ്ങളെല്ലാം തള്ളിക്കളയുന്ന നിലപാടാണ് മമത ബാനർജിയും നേതാക്കളും സ്വീകരിക്കുന്നത്. ബിജെപി ഇത്തവണ 50 സീറ്റുകൾ കടക്കില്ലെന്നും 235 സീറ്റുകൾ നേടി തൃണമൂൽ നാലാമതും അധികാരത്തിലെത്തുമെന്നും നേതാക്കൾ ആത്മവിശ്വാസം പ്രകടിപ്പിച്ചു.

മുൻകാലങ്ങളിലെ എക്സിറ്റ് പോൾ പ്രവചനങ്ങൾ ബംഗാളിൽ പാളിയത് തൃണമൂൽ ചൂണ്ടിക്കാട്ടുന്നു. 2024 ലോക്സഭാ തെരഞ്ഞെടുപ്പിൽ ബിജെപി മുന്നേറ്റം പ്രവചിക്കപ്പെട്ടെങ്കിലും 42-ൽ 29 സീറ്റും ടിഎംസിയാണ് നേടിയത്. സംസ്ഥാന ചരിത്രത്തിലെ തന്നെ റെക്കോഡ് പോളിംഗായ 92.49 ശതമാനം രേഖപ്പെടുത്തിയതും തങ്ങൾക്ക് അനുകൂലമാകുമെന്ന് ഭരണകക്ഷി കണക്കുകൂട്ടുന്നു. അതേസമയം, വോട്ടിംഗ് മെഷീനിൽ ബിജെപി സ്ഥാനാർത്ഥിയുടെ പേര് മറച്ചതടക്കം 77 ഇടങ്ങളിൽ ക്രമക്കേട് നടന്നതായി പരാതി ലഭിച്ചിട്ടുണ്ടെന്നും ഇവിടെ റീപോളിംഗ് നടത്തേണ്ടി വരുമെന്നും തെരഞ്ഞെടുപ്പ് കമ്മീഷൻ അറിയിച്ചു.

അസമിൽ എൻഡിഎയ്ക്ക് വൻ വിജയം പ്രഖ്യാപിച്ച പ്രവചനങ്ങൾ കോൺഗ്രസ് ക്യാമ്പിനെ കടുത്ത നിരാശയിലാഴ്ത്തിയിരിക്കുകയാണ്. അവസാന നിമിഷം പാർട്ടി നടത്തിയ പരീക്ഷണങ്ങൾ പാളിയോ എന്ന ആശങ്ക നേതൃത്വത്തിനുണ്ട്. എഐയുഡിഎഫ്, ബോഡോ പാർട്ടികൾ എന്നിവയുമായി സഖ്യം രൂപീകരിക്കാത്തതും ഗൗരവ് ഗോഗോയിയെ പിസിസി അധ്യക്ഷനായി നിയമിച്ചതും പ്രതീക്ഷിച്ച ഫലം നൽകിയില്ലെന്നാണ് പ്രാഥമിക വിലയിരുത്തൽ. എക്സിറ്റ് പോൾ ഫലങ്ങൾ ബിജെപി ക്യാമ്പിൽ വലിയ ആവേശമാണ് ഉണ്ടാക്കിയിരിക്കുന്നത്