മുഖ്യമന്ത്രി പിണറായി വിജയനെ കരിങ്കൊടി കാണിച്ചു; എട്ട് പേര്‍ക്ക് തടവും പിഴയും

മലപ്പുറം: മുഖ്യമന്ത്രി പിണറായി വിജയനു നേരെ കോഴിക്കോട് കരിങ്കൊടി (Black flag for CM Pinarayi Vijayan, Youth Congress leaders jailed) കാണിച്ച എട്ടുപേര്‍ക്ക് തടവും പിഴയും ശിക്ഷ വിധിച്ച് കോടതി. എട്ട് യൂത്ത് കോണ്‍ഗ്രസ് പ്രവര്‍ത്തകര്‍ക്ക് ആണ് ഒരു മാസം തടവും 5,200 രൂപ പിഴയും വിധിച്ചത്. ചീഫ് ജുഡീഷ്യല്‍ മജിസ്‌ട്രേറ്റ് എസ്.രശ്മിയാണ് കേസിൽ വിധി പറഞ്ഞത്.

യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റ് റിയാസ് മുക്കോളി(38), സംസ്ഥാന സെക്രട്ടറി പുത്തൂര്‍ പള്ളിക്കല്‍ കൂനൂര്‍മാട് വൃന്ദാവന്‍ നിതീഷ് (27), അബ്ദുള്‍ ലത്തീഫ് (39), ജൈസല്‍ എളമരം (40), അബ്ദുള്‍ ജലീല്‍ (39), അഷ്‌റഫ് (38), റഹ്മത്തുള്ള (41), അബ്ദുള്‍ അലി (40) എന്നിവര്‍ക്കാണ് തടവും പിഴയും ശിക്ഷ വിധിച്ചത്. ഇതിനുപുറമെ ദേഹോപദ്രവം ഏല്‍പ്പിച്ചതിന് ഒന്നാം പ്രതിയായ റിയാസ് 3000 രൂപ കൂടി പിഴയടക്കണം. അതേസമയം കോടതി വിധിക്കെതിരെ അപ്പീല്‍ നല്‍കുമെന്ന് റിയാസ് മുക്കോളി പറഞ്ഞു.

2016 ഒക്ടോബര്‍ 5നാണ് കേസിനാസ്പദമായ സംഭവം നടന്നത്. കോഴിക്കോട് വിമാനത്താവളത്തിന്റെ പരിസരത്ത് സ്വാശ്രയ കോളേജ് ഫീസ് വര്‍ധനയ്‌ക്കെതിരെ നടന്ന സമരത്തിന്റെ ഭാഗമായി മുഖ്യമന്ത്രി പിണാറായി വിജയനെ കരിങ്കൊടി കാണിച്ചതിനാണ് കരിപ്പൂര്‍ പോലീസ് കേസെടുത്തത്.