വ്യവസായ പ്രമുഖൻ ടി.പി.ജി നമ്പ്യാര്‍ അന്തരിച്ചു ; വിടവാങ്ങിയത് ഒരു കാലത്ത് രാജ്യത്തെ ഇലക്ട്രോണിക്സ് ഉപകരണങ്ങളുടെ മറുവാക്കായിരുന്ന ബിപിഎൽ കമ്പനിയുടെ സ്ഥാപകൻ

ബെംഗളൂരു :ഒരു കാലത്ത് ഇലക്ട്രോണിക്സ് ഉപകരണങ്ങളുടെ മറുവാക്കായിരുന്ന ബിപിഎൽ കമ്പനിയുടെ സ്ഥാപകനും പ്രമുഖ വ്യവസായിയുമായ ടി.പി.ജി നമ്പ്യാര്‍ (96) അന്തരിച്ചു. ഇന്ന് രാവിലെ സ്വവസതിയില്‍ ആയിരുന്നു അന്ത്യം. മുന്‍ കേന്ദ്രമന്ത്രിയും പ്രമുഖ വ്യവസായിയുമായ രാജീവ് ചന്ദ്രശേഖര്‍ അദ്ദേഹത്തിന്റെ മരുമകനാണ്.

1963-ലാണ് അദ്ദേഹം ബ്രിട്ടീഷ് ഫിസിക്കല്‍ ലാബോറട്ടറീസ് ഇന്ത്യ പ്രൈവറ്റ് ലിമിറ്റഡ് എന്ന സ്ഥാപനം ഏറ്റെടുക്കുന്നത്. പ്രതിരോധ സേനകള്‍ക്കുള്ള പ്രിസിഷന്‍ പാനല്‍ മീറ്ററുകളുടെ നിർമ്മാണത്തിലായിരുന്നു കമ്പനി ആദ്യം ശ്രദ്ധ കേന്ദ്രീകരിച്ചിരുന്നത്. പിന്നീട് കമ്പനിയുടെ പേര് ബിപിഎൽ എന്നാക്കുകയും ഇലക്ട്രോണിക്‌സ് ഉപകരണങ്ങളുടെ നിര്‍മാണത്തിലേക്ക് തിരിയുകയും ചെയ്തു. തൊണ്ണൂറുകളിൽ ഇന്ത്യയിലെ ഇലക്ട്രോണിക്‌സ് ഉപകരണനിര്‍മാണ രംഗത്തെ അതികായരായി ബിപിഎൽ വളര്‍ന്നു.
വളരെ വേഗം ബിപിഎൽ ഇന്ത്യയിലെ ടെലികോം – ഇലക്ട്രോണിക് ഉപകരണ നിര്‍മാണ രംഗത്ത് സാന്നിധ്യമുറപ്പിച്ചു. ജപ്പാനിലെ സാന്യോ അടക്കമുള്ള വമ്പന്‍ കമ്പനികളുമായി അദ്ദേഹം കൈകോര്‍ത്തിരുന്നു. 1998 ല്‍ 2500 കോടിയിലധികമായി കമ്പനിയുടെ വരുമാനം. കമ്പനിയുടെ ആസ്തികളും ഇക്കാലത്ത് കുതിച്ചുയര്‍ന്നു. 200 ഓളം ഉത്പന്നങ്ങള്‍ ഒരുകാലത്ത് ബിപിഎല്‍ വിപണിയില്‍ എത്തിച്ചിരുന്നു.

അജിത് നമ്പ്യാർ, അഞ്ജു ചന്ദ്രശേഖർ എന്നിവർ മക്കളാണ്. സംസ്കാര ചടങ്ങുകൾ നാളെ ബെംഗളൂരു കൽപ്പള്ളി ശ്മശാനത്തിൽ വച്ച് നടക്കും