ഭാരതത്തിലെ വിമാനങ്ങളും റെയിൽവേ സംവിധാനവും നേരിടുന്ന ഭീഷണികളെക്കുറിച്ച് ശക്തമായ അന്വേഷണം ആരംഭിച്ച കേന്ദ്ര ഏജൻസികൾ; സോഷ്യൽ മീഡിയ പ്ലാറ്റഫോം എക്സിന്റെയും മെറ്റയുടെയും സഹായം തേടി

ദില്ലി : ഭാരതത്തിലെ വിമാനങ്ങളും റെയിൽവേ സംവിധാനവും നേരിടുന്ന ഭീഷണികളെക്കുറിച്ച് അന്വേഷണം ശക്തമാക്കുന്നതിനായി, സോഷ്യൽ മീഡിയ പ്ലാറ്റ്ഫോമുകളായ എക്സിന്റെയും മെറ്റയുടെയും സഹായം തേടി കേന്ദ്ര ഏജൻസികൾ. കഴിഞ്ഞ കുറച്ചു ആഴ്ചകളായി വിമാനക്കമ്പനികൾക്ക് നേരെ വ്യാജ ബോംബ് ഭീഷണികൾ ഉയർന്നതോടൊപ്പം, രാജ്യത്തിന്റെ വിവിധ ഭാഗങ്ങളിലെ റെയിൽവേ ട്രാക്കുകളിൽ സംശയാസ്പദമായ വസ്തുക്കളും കണ്ടെത്തുകയും ചെയ്തിരുന്നു.

കഴിഞ്ഞ 10 ദിവസത്തിനിടെ മാത്രം വിമാനക്കമ്പനികൾ 200-ലധികം വ്യാജ ബോംബ് ഭീഷണികൾ നേരിടേണ്ടിവന്നതായി അറിയുന്നു. വ്യോമയാന മന്ത്രാലയവും ഐടി മന്ത്രാലയവും ചേർന്ന് ഈ ഭീഷണികളെ നിരീക്ഷിച്ച് വരികയാണ്. അതേസമയം, റെയിൽവേ മന്ത്രാലയവും ട്രാക്കുകളിൽ കണ്ടെത്തുന്ന വസ്തുക്കളെ സംബന്ധിച്ച വിശദമായ പരിശോധനകൾ നടത്തുന്നു.

സോഷ്യൽ മീഡിയയിൽ ക്രിമിനൽ കാര്യങ്ങളുമായി ബന്ധപ്പെട്ട സന്ദേശങ്ങൾ പോസ്റ്റ് ചെയ്യുന്നവരെ കണ്ടെത്തുന്നതിനായി എക്സ്, മെറ്റ എന്നിവയുടെ പിന്തുണ ആവശ്യപ്പെട്ടതായി കേന്ദ്രം അറിയിച്ചു.