കേന്ദ്ര ബജറ്റ് 2024-25 : സാധാരണക്കാരുടെ മനസ്സറിഞ്ഞ് കേന്ദ്ര സർക്കാർ ! ആദ്യ പ്രഖ്യാപനങ്ങൾ മണ്ണിൽ പൊന്നുവിളയിക്കുന്നവർക്കായി ; നാരീശക്തിക്ക് പ്രത്യേക പരിഗണന ; പുതുതലമുറയ്ക്ക് ആശ്വാസം ; എന്തിനൊക്കെ വില കുറയും, കൂടും ? ബജറ്റിലെ സുപ്രധാന പ്രഖ്യാപനങ്ങൾ ഒറ്റനോട്ടത്തിൽ

ദില്ലി : മൂന്നാം നരേന്ദ്രമോദി സർക്കാരിന്റെ ആദ്യ ബജറ്റ് ധനമന്ത്രി നിർമല സീതാരാമൻ അവതരിപ്പിച്ചു. ദീർഘകാല സാമ്പത്തിക വളർച്ചയ്‌ക്കും സുസ്ഥിര വികസനവും മുന്നിൽ കണ്ട് ഒൻപത് മേഖലകൾക്കാണ് 2024-25 സാമ്പത്തിക വർഷത്തെ ബജറ്റ് ഊന്നൽ നൽകുന്നത്. കാർഷികോത്പാദനം, തൊഴിൽ, നൈപുണ്യ വികസനം, മാനവവിഭവശേഷിയും സാമൂഹിക നീതിയും, ഉത്പാദനവും സേവനവും, നഗര വികസനം, ഊർജ സുരക്ഷ, അടിസ്ഥാന സൗകര്യം, ഗവേഷണം തുടങ്ങി ഒൻപത് മേഖലകൾ കേന്ദ്രീകരിച്ചാണ് വികസനം നടപ്പാക്കുക.

കർഷകർക്ക് പ്രത്യേക പരിഗണന നൽകിയാണ് ബജറ്റ് പ്രഖ്യാപനങ്ങൾ ആരംഭിച്ചത്. കാർഷിക മേഖലയ്ക്ക് 1.52 കോടി രൂപയാണ് ബജറ്റിൽ വകയിരുത്തിയത്. കൂടാതെ, പിഎം ആവാസ് യോജനയിലൂടെ നഗരങ്ങളിൽ 1 കോടി വീടുകൾ നിർമിച്ചു നൽകും. 10 ലക്ഷം കോടി രൂപ ഇതിനായി നീക്കിവയ്ക്കുമെന്നാണ് ബജറ്റിൽ പ്രഖ്യാപിച്ചിരിക്കുന്നത്. അതോടൊപ്പം, യുവാക്കൾക്ക് ആശ്വാസമേകുന്ന നിരവധി പ്രഖ്യാപനങ്ങളാണ് ബജറ്റിൽ പ്രഖ്യാപിച്ചിരിക്കുന്നത്. പുതിയതായി ജോലിയ്ക്ക് കയറുന്ന എല്ലാവർക്കും ഒരു മാസത്തെ ശമ്പളം സർക്കാർ നൽകുമെന്നാണ് പ്രഖ്യാപിച്ചിരിക്കുന്നത്. പ്രൊവിഡന്റ് ഫണ്ട് വിഹിതമായി ആയിരിക്കും ഇത് നൽകുകയെന്ന് ധനമന്ത്രി നിർമല സീതാരാമൻ അറിയിച്ചു.

അതേസമയം, ബജറ്റിൽ രാജ്യത്തിന്റെ നാരീശക്തികൾക്ക് പ്രത്യേക പരിഗണന നൽകിയിട്ടുണ്ട്. വനിതാ ശാക്തീകരണത്തിനായി മാത്രം 3 ലക്ഷം കോടി രൂപയാണ് ബജറ്റിൽ മാറ്റിവച്ചിരിയ്ക്കുന്നത്. സ്ത്രീകൾക്കായി പ്രത്യേക നൈപുണ്യ പരിശീലന കേന്ദ്രങ്ങൾ, കൂടുതൽ വർക്കിങ് വുമൺ ഹോസ്റ്റലുകൾ രാജ്യത്ത് സാധ്യമാക്കുമെന്നും ധനമന്ത്രി നിർമല സീതാരാമൻ പ്രഖ്യാപിച്ചു. കൂടാതെ, കാൻസർ മരുന്നിന് വില കുറയും. മൂന്ന് കാൻസർ മരുന്നുകളുടെ കസ്റ്റംസ് ഡ്യൂട്ടിയും ഒഴിവാക്കിയിട്ടുണ്ട്. മൊബൈൽ ഫോണുകളുടെയും ചാർജറിന്റെയും വില കുറയും. ഫോൺ ഇറക്കുമതി തീരുവ കുറച്ചു. സ്വർണ്ണം, വെള്ളി എന്നിവയുടെ വിലകൾ കുറയും. സ്വർണ്ണത്തിന്റെ ഇറക്കുമതി തീരുവയും വെള്ളിയുടെ തീരുവയും കുറച്ചു.

കൂടാതെ, 20 ധാതുകൾക്ക് കസ്റ്റംസ് ഡ്യൂട്ടി കുറച്ചിട്ടുണ്ട്. സ്വർണ്ണത്തിന്റെയും വെള്ളിയുടെയും കസ്റ്റംസ് തീരുവ 6 ശതമാനമായും, പ്ലാറ്റിനത്തിന്റെ 6.4 ശതമാനമായും കുറയ്ക്കും. ആഭ്യന്തര മൂല്യവർധന ലക്ഷ്യമിട്ടാണ് ഈ പ്രഖ്യാപനം. അതേസമയം, വസ്ത്രങ്ങളുടെ കസ്റ്റംസ് ഡ്യൂട്ടി കുറച്ചതോടെ ഇവയ്ക്കും വില കുറയും. തുകൽ ഉൽപ്പനങ്ങൾക്കും താരതമ്യേന വിലകുറയും. കൂടാതെ, പ്ലാസ്റ്റിക്കിന് കസ്റ്റംസ് ഡ്യൂട്ടി വർദ്ധിപ്പിച്ചിട്ടുണ്ട്. ഇതോടെ ഇവയ്ക്ക് വില വർദ്ധിക്കും. സമുദ്രോൽപന്നങ്ങളുടെ കയറ്റുമതി വർധിപ്പിക്കാൻ നികുതിയിളവ് നൽകും. മത്സ്യങ്ങൾക്കുള്ള തീറ്റ ഉൾപ്പടെ 3 ഉൽപന്നങ്ങൾക്ക് നികുതി കുറയ്ക്കും. ചെമ്മീൻ തീറ്റയ്ക്ക് ഉൾപ്പടെ വില കുറയ്ക്കുമെന്നും ബജറ്റിൽ നിർമല സീതാരാമൻ പ്രഖ്യാപിച്ചു.

ബജറ്റിലെ മറ്റ് സുപ്രധാന പ്രഖ്യാപനങ്ങൾ :

• സോളാർ പാനലുകൾക്കും സെല്ലുകൾകൾക്കും തീരുവ നീട്ടില്ല.
• പിവിസി, ഫ്ലക്സ്-ബാനറുകൾക്ക് തീരുവ 10 മുതൽ 25 ശതമാനം വരെ ആക്കി ഉയർത്തും.
• ഇ-കോമേഴ്സ് വ്യാപാരത്തിന്റെ ടി ഡി എസ് കുറച്ചു.
• കുടുംബ പെൻഷൻകാരുടെ ഇളവ് പരിധി 15,000-ൽ നിന്ന് 25,000 ആയി ഉയർത്തി.
• ആദായനികുതിയുടെ സ്റ്റാൻഡേഡ് ഡിഡക്ഷൻ കൂട്ടി. 50000 ത്തിൽ നിന്ന് 75000 ആയാണ് സ്റ്റാൻഡേർഡ് ഡിഡക്ഷൻ ഉയർത്തിയത്.
• കോർപ്പറേറ്റ് നികുതി കുറച്ചു. വിദേശസ്ഥാപനങ്ങൾക്കുള്ള കോർപ്പറേറ്റ് നികുതി 35 ശതമാനമായി കുറച്ചു.
• കാരുണ്യ പ്രവർത്തനങ്ങൾക്കായുള്ള ധന വിനിമയത്തെ നികുതിയിൽ നിന്ന് ഒഴിവാക്കും.
• പിഎം സൂര്യഘർ മുഫ്ത് ബിജിലി യോജന-പുരപ്പുറ സൗരോർജ പദ്ധതിയിൽ മാസം 300 യൂണിറ്റ് സൗജന്യം.
• ബഹിരാകാശ മേഖലയ്ക്ക് 1000 കോടി. 100 നഗരങ്ങൾക്ക് വ്യവസായ പാർക്ക്.
• ഗവേഷണം പ്രോത്സാഹിപ്പിക്കാൻ അനുസന്ധാൻ നാഷണൽ റിസർച്ച് ഫണ്ട്. അടിസ്ഥാന ഗവേഷണത്തിനും പ്രോട്ടോ ടൈപ്പ് വികസിപ്പിക്കുന്നതിനും ഈ ഫണ്ട് ഉപയോഗിക്കാം.
• നളന്ദ സർവകലാശാലയുടെ വികസനത്തിന് മുൻ​ഗണന നൽകും.
• ഗയ, ബോധ്ഗയ ക്ഷേത്രങ്ങൾ നവീകരിക്കും
• പ്രളയം നേരിടാൻ ബിഹാറിന് 11,500 കോടി
• മൂലധന ചെലവുകൾക്ക് 11,11,111 കോടി രൂപ
• പ്രായപൂർത്തി ആകാത്ത മക്കൾക്കായി രക്ഷിതാക്കളുടെ നിക്ഷേപ പദ്ധതി – എൻപിഎസ് വാത്സല്യ
• ബിഹാറിൽ രണ്ട് ക്ഷേത്ര ഇടനാഴികൾക്ക് സഹായം.
• നഗരപ്രദേശങ്ങളിലെ ഭൂരേഖകൾ ഡിജിറ്റിലൈസ് ചെയ്യും.
• പ്രളയം നേരിടാൻ ബീഹാറിന് പുറമെ അസം, ഹിമാചൽ, ഉത്തരാഖണ്ഡ്, സിക്കിം സംസ്ഥാനങ്ങൾക്ക് സഹായം നൽകും.
• തെരഞ്ഞെടുത്ത ന​ഗരങ്ങളിൽ 100 സ്ട്രീറ്റ് ഫുഡ് ഹബ്ബുകൾ
• പ്രധാനമന്ത്രി ​ഗ്രാമ സടക് യോജന ഫേസ്-4 ലൂടെ എല്ലാ കാലാവസ്ഥയിലും ഉപയോ​ഗിക്കാനാകുന്ന റോ‍ഡുകൾ‌ യാഥാർത്ഥ്യമാക്കും. 25,000 ​ഗ്രാമീണ മേഖലകളിൽ റോഡുകൾ നടപ്പിലാക്കും.
• തദ്ദേശീയ താപവൈദ്യുതി നിലയങ്ങൾ യാഥാർത്ഥ്യമാക്കും. ഒരു കോടി വീടുകൾക്ക് കൂടി സോളാർ പദ്ധതി സ്ഥാപിക്കാൻ സഹായം നൽകും.
• ഭക്ഷ്യ സുരക്ഷ ഉറപ്പാക്കാൻ പോളവാരം പദ്ധതി നടപ്പിലാക്കും.
• മുദ്ര വായ്പയുടെ പരിധി പത്ത് ലക്ഷത്തിൽ നിന്ന് 20 ലക്ഷമാക്കി ഉയർത്തി.
• വനവാസി വിഭാഗങ്ങളുടെ സാമൂഹിക സാമ്പത്തിക ക്ഷേമത്തിന് കൂടുതൽ പദ്ധതികൾ.
• ബിഹാറിനു പുതിയ വിമാനത്താവളം. ഹൈവേ വികസനത്തിന് 26,000 കോടി. മെഡിക്കൽ കോളേജ് യഥാര്‍ഥ്യമാക്കും.
• എംഎസ്എംഇകൾക്ക് ഈടില്ലാതെ വായ്പ. ഇതിനായി ആയിരം കോടി വകയിരുത്തും.
• ചെറുകിട ഇടത്തരം മേഖലക്ക് 100 കോടി രൂപയുടെ ധനസഹായം.
• കിസാൻ ക്രഡിറ്റ് കാർഡ് അഞ്ച് സംസ്ഥാനങ്ങൾക്ക് കൂടി നൽകും.
• ഗരീബ് കല്യാൺ യോജനയുടെ പ്രയോജനം 80 കോടി പേർക്ക് കൂടി ലഭ്യമാക്കും.
• 10,000 വ്യവസായ പരിശീലന കേന്ദ്രങ്ങൾ ആരംഭിക്കും.
• വിവിധ വകുപ്പുകൾ വഴി ആന്ധ്രപ്രദേശിന് 15,000 കോടിയുടെ സഹായം.
• അമൃത്സർ-കൊൽക്കത്ത വ്യവസായ ഇടനാഴിക്ക് സാമ്പത്തിക സഹായം നൽകും.
• പട്ന-പൂനെ എക്സ്പ്രസ് വേ, ബു​ക്സാർ-ഭ​ഗൽപൂർ ഹൈവേ, ബോധ്​ഗയ-രാജ്​ഗിർ‌-വൈശാലി- ദർഭം​ഗ റോഡ്, ബുക്സറിൽ ​ഗം​ഗാനദിക്ക് മുകളിലൂടെ ഇരട്ട ലൈൻ പാലം എന്നിവയ്‌ക്ക് 26,000 കോടി.
• രാജ്യത്തിനകത്തെ വിദ്യാഭ്യാസ സ്ഥാപനങ്ങളിൽ‌ ഉന്നത വിദ്യാഭ്യാസത്തിനായി 10 ലക്ഷം രൂപ വരെയുള്ള വായ്പകൾക്ക് സർക്കാർ പിന്തുണ.
• മൂന്ന് വർഷത്തിനകം 400 ജില്ലകളിൽ ഡിജിറ്റൽ വിള സർവേ
• ഭൂമി രജിസ്ട്രി തയ്യാറാക്കും.
• 10,000 ബയോ ഇൻപുട്ട് റിസോഴ്സ് സെൻ്ററുകൾ
• കാർഷിക അനുബന്ധ മേഖലകൾക്ക് 1.52 ലക്ഷം കോടി നൽകും.
• പച്ചക്കറി ഉത്പാദനത്തിന് ക്ലസ്റ്ററുകൾ.
• വിദ്യാഭ്യാസം, നൈപുണ്യ വികസനം, തൊഴിൽ എന്നിവയ്‌ക്ക് 1.48 ലക്ഷം കോടി വകയിരുത്തും.
• പത്ത് ലക്ഷം രൂപ വരെ വിദ്യാഭ്യാസ വായ്പാ സഹായം നൽകും.