കേന്ദ്രസർക്കാർ ഇടപെട്ടു; തോട്ടിപ്പണി, ശുചീകരണ തൊഴിലാളികളുടെ അപകടമരണങ്ങൾ കുറഞ്ഞതായി കണക്കുകൾ

ദില്ലി: രാജ്യത്ത് ഏറെ അപകടം പിടിച്ച തോട്ടിപ്പണി, ശുചീകരണ തൊഴിലാളികളുടെ അപകട മരണങ്ങൾ ഇന്ത്യയിൽ ഗണ്യമായി കുറഞ്ഞതായി കണക്കുകൾ പുറത്തുവരുന്നു . 2019 ൽ 118 പേർ മരണമടഞ്ഞ സ്ഥാനത്ത് 2021 ആയപ്പോഴേക്കും 24 ആയി കുറഞ്ഞതായി കേന്ദ്ര സാമൂഹ്യനീതി ശാക്തീകരണ മന്ത്രാലയം സഹമന്ത്രി രാംദാസ് അതാവാലെ രാജ്യസഭയിൽ വ്യക്തമാക്കിയിരിക്കുകയാണ് ഇപ്പോൾ. ഓടകൾ, സെപ്റ്റിക് ടാങ്കുകൾ എന്നിവ അപകടകരമായ വിധത്തിൽ വൃത്തിയാക്കുന്നത് മൂലമുണ്ടാകുന്ന മരണങ്ങൾ, 2013ലെ ‘തോട്ടിപ്പണി നിരോധന പുനരധിവാസ ചട്ടങ്ങൾ’ പ്രകാരമുള്ള സുരക്ഷാ മുൻകരുതലുകളുടെ ലംഘനം എന്നിവ സർക്കാർ ഗൗരവത്തോടെയാണ് കണക്കിലെടുക്കുന്നതെന്ന് അദ്ദേഹം പറഞ്ഞു.

അതേസമയം രാജ്യത്ത് ഇത്തരത്തിലുളള മരണം തുടർക്കഥയായതോടെയാണ് കേന്ദ്രസർക്കാർ ഇക്കാര്യത്തിൽ ശ്രദ്ധിച്ചു തുടങ്ങിയത്. ഇവർക്ക് ആവശ്യമായ യന്ത്രസഹായം എത്തിച്ചും കൂടുതൽ സുരക്ഷാ ഉപകരണങ്ങൾ നൽകുകയുമായിരുന്നു സർക്കാർ സ്വീകരിച്ച ആദ്യ നടപടികൾ. രാജ്യത്ത് ശുചീകരണ പ്രവർത്തനങ്ങളിൽ ഏർപ്പെട്ടിരിക്കുന്ന തൊഴിലാളികൾക്ക് പരിശീലനം നൽകൽ, അവർക്ക് ആവശ്യമായ യന്ത്ര സഹായം ലഭ്യമാക്കൽ തുടങ്ങിയ നടപടികളിലൂടെയാണ് കാലങ്ങളായി ജീവൻ പണയം വെച്ച് ഇത്തരം ജോലി ചെയ്തിരുന്നവരെ സർക്കാർ സഹായിച്ചത്.

‘പ്രധാനമന്ത്രിയുടെ പ്രത്യേക താൽപര്യപ്രകാരമായിരുന്നു ഇതിനുളള നടപടികൾ സ്വീകരിച്ചത്. കേന്ദ്ര ഭവന നിർമ്മാണ നഗരകാര്യ മന്ത്രാലയം, കുടി വെള്ള-ശുചിത്വ വകുപ്പ് എന്നിവയുമായുള്ള ചർച്ചകളിലൂടെ, യന്ത്രവൽകൃത ശുചീകരണ സംവിധാനം ലക്ഷ്യമിട്ടുള്ള ഒരു ദേശീയനയത്തിനു രൂപം നൽകി. യന്ത്രവത്കൃത ശുചീകരണ പ്രവർത്തനങ്ങൾക്കായി മികച്ച പരിശീലനം ലഭിച്ച മനുഷ്യവിഭവശേഷി, മുനിസിപ്പാലിറ്റി ജീവനക്കാർ, കരാറുകാർ എന്നിവർക്ക് ഓടകൾ, സെപ്റ്റിക് ടാങ്കുകൾ എന്നിവയുടെ യന്ത്രവൽകൃത ശുചീകരണം സംബന്ധിച്ച പരിശീലനം, സെപ്റ്റിക് ടാങ്കുകളിൽ നിന്നുള്ള മാലിന്യങ്ങളുടെ നീക്കം, ഗതാഗതം, സംസ്‌കരണം എന്നിവയ്‌ക്കായി പ്രത്യേക സംവിധാനങ്ങൾ സജ്ജമാക്കൽ, ഓടകൾ, സെപ്റ്റിക് ടാങ്കുകൾ എന്നിവ കെട്ടിക്കിടക്കുന്നത് സംബന്ധിച്ച പരാതി സ്വീകരണത്തിനായി 24 മണിക്കൂറും പ്രവർത്തിക്കുന്ന ഹെൽപ് ലൈൻ തുടങ്ങിയവ ഈ നയത്തിന്റെ പ്രധാന ലക്ഷ്യങ്ങളാണ്’- രാജ്യസഭയിൽ എഴുതി നൽകിയ മറുപടിയിൽ മന്ത്രി വ്യക്തമാക്കി.