ഉമ്മൻ ചാണ്ടിയെ വേണം എന്നാൽ കോൺഗ്രസിന് ചാണ്ടി വെറും ചണ്ടി; പിതാവിന്റെ കല്ലറയ്ക്ക് മുന്നിൽ തനിച്ചു നിൽക്കുന്ന ചിത്രം പോസ്റ്റ് ചെയ്‌ത്‌ ചാണ്ടി ഉമ്മൻ; അവഗണനയിൽ ഹൈക്കമാൻഡിന് പരാതി നൽകി

തിരുവനന്തപുരം: പാർട്ടിയിൽ കടുത്ത അവഗണന നേരിടുന്നതായി മുൻമുഖ്യമന്ത്രി ഉമ്മൻ ചാണ്ടിയുടെ മകനും എം എൽ എയുമായ ചാണ്ടി ഉമ്മൻ. പാർട്ടിക്ക് തെരഞ്ഞെടുപ്പുകളിൽ ഉമ്മൻ ചാണ്ടിയെ വേണം. സ്ഥാനാർത്ഥികൾ ഉമ്മൻചാണ്ടിയുടെ കല്ലറയ്ക്കുമുന്നിൽ മദ്ധ്യമങ്ങളുമായെത്തി പ്രാർത്ഥിക്കുന്നത് കേരളം കണ്ടിട്ടുണ്ട്. ഉമ്മൻചാണ്ടിയുടെ ജനസമ്മിതി പ്രയോജനപ്പെടുത്തുകയാണ് ലക്‌ഷ്യം. എന്നാൽ മകൻ ചാണ്ടി ഉമ്മന് കടുത്ത അവഗണനയാണ് പാർട്ടിയിൽ എന്നാണ് സൂചന. ഉപതെരഞ്ഞെടുപ്പുകളിൽ എല്ലാ എം എൽ എ മാർക്കും ചുമതല നൽകിയപ്പോൾ തന്നെമാത്രം മാറ്റിനിർത്തിയെന്നാണ് ചാണ്ടി ഉമ്മന്റെ പരാതി.

കോൺഗ്രസ് ഹൈക്കമാൻഡിന് ഇക്കാര്യം ചൂടിക്കാട്ടി ചാണ്ടി പരാതി നൽകിയിട്ടുണ്ട്. ചാണ്ടി ഉമ്മനെ അനുകൂലിക്കുന്ന ചിലരുടെ പാർട്ടി സ്ഥാനങ്ങളും തെറിച്ചതായി സൂചനയുണ്ട്. അതേസമയം ഉമ്മൻചാണ്ടിയുടെ കല്ലറയിൽ തനിച്ചു നിൽക്കുന്ന ചിത്രം ചാണ്ടി ഉമ്മൻ പോസ്റ്റ് ചെയ്‌തത്‌ ഊഹാപോഹങ്ങൾക്ക് ഇടയാക്കുന്നുണ്ട്. അൽപ്പസമയം മുമ്പാണ് ചാണ്ടി ഉമ്മൻ ചിത്രം പോസ്റ്റ് ചെയ്‌തിരിക്കുന്നത്‌. പരാതിയിൽ പരിഹാരം ഉണ്ടായില്ലെങ്കിൽ ചാണ്ടി ഉമ്മൻ പാർട്ടി വിടുമോയെന്ന ചോദ്യവും ഉയരുന്നുണ്ട്. പാർട്ടി വിടുകയാണെങ്കിൽ മുൻമുഖ്യമന്ത്രി എ കെ ആന്റണിയുടെ മകൻ അനിൽ ആന്റണിയുടെയും മറ്റൊരു മുൻമുഖ്യമന്ത്രി കെ കരുണാകരന്റെ മകൾ പത്മജാ വേണുഗോപാലിനെയും പോലെ ബിജെപിയിലേക്കോ അതോ ഡോ. പി സരിനെ പോലെ എൽ ഡി എഫിലേക്കോ എന്ന ചോദ്യം ഉയരുകയാണ് സമൂഹ മാദ്ധ്യമങ്ങളിൽ.