“വിഴിഞ്ഞം പദ്ധതി പൂര്‍ത്തിയാക്കാന്‍ മുന്‍കൈയ്യെടുത്തു ! പദ്ധതിക്കായി മികച്ച രീതിയിൽ സഹകരിച്ചു” അദാനി ഗ്രൂപ്പിനെ പ്രശംസിച്ച് മുഖ്യമന്ത്രി പിണറായി വിജയൻ

തിരുവനന്തപുരം :വിഴിഞ്ഞം തുറമുഖത്തെത്തിയ ആദ്യ കപ്പളായ ഷെന്‍ഹുവായ് 15-ന് നൽകിയ ഔദ്യോഗിക സ്വീകരണ പരിപാടിയില്‍ സമയബന്ധിതമായി പദ്ധതി പൂര്‍ത്തിയാക്കാന്‍ കാണിച്ച മുന്‍കൈയും സഹകരണവും മുന്‍നിര്‍ത്തി അദാനി ഗ്രൂപ്പിനെയും ചടങ്ങില്‍ പങ്കെടുത്ത കരണ്‍ അദാനിയേയും പ്രശംസിച്ച് മുഖ്യമന്ത്രി പിണറായി വിജയൻ. അതെ സമയം വിഴിഞ്ഞം തുറമുഖ പദ്ധതിക്കെതിരെ അന്താരാഷ്ട്ര ലോബികള്‍ നീക്കം നടത്തിയിരുന്നുവെന്ന് മുഖ്യമന്ത്രി പിണറായി വിജയന്‍. ചില വാണിജ്യ ശക്തികളും പദ്ധതിക്കെതിരെ ഉണ്ടായിരുന്നുവെന്നും എന്നാൽ അതിനെയെല്ലാം അതിജീവിക്കാന്‍ കഴിഞ്ഞുവെന്നും അദ്ദേഹം കൂട്ടിച്ചേർത്തു. രാജ്യത്ത് ആദ്യമായാണ് കേന്ദ്രസര്‍ക്കാര്‍ തുറമുഖ നിര്‍മാണത്തിനായി വയബിലിറ്റി ഗ്യാപ് ഫണ്ട് അംഗീകരിച്ചതെന്നും കേന്ദ്രസര്‍ക്കാരും നല്ല മുന്‍ഗണനയോടുകൂടിത്തന്നെയാണ് പദ്ധതിയെ കാണുന്നതെന്നും മുഖ്യമന്ത്രി പറഞ്ഞു

‘രാജ്യത്തിന്റെയാകെ അഭിമാനകരമായ പദ്ധതിയാണിത്. അത്തരമൊരു കാര്യം ഒരിടത്ത് ഉയര്‍ന്നുവരുമ്പോള്‍ ചില അന്താരാഷ്ട്രാലോബികള്‍ സ്വാഭാവികമായും അതിനെതിരെ അവരുടെ താത്പര്യങ്ങള്‍വെച്ചുകൊണ്ടുള്ള എതിരായ നീക്കങ്ങള്‍ നടത്താറുണ്ട്. ഇവിടെയും അത്തരം ശക്തികള്‍ നേരത്തെ ഉണ്ടായിരുന്നു. ചില പ്രത്യേക വാണിജ്യലോബികള്‍ക്കും ഇത്തരം തുറമുഖം ഇവിടെ യാഥാര്‍ഥ്യമാകുന്നതില്‍ താത്പര്യമുണ്ടായിരുന്നില്ല. അവരും പ്രത്യേകരീതിയില്‍ ഇതിനെതിരെ രംഗത്തുണ്ടായിരുന്നു. അതിനെയെല്ലാം അതിജീവിക്കാന്‍ കഴിഞ്ഞു. കേരളം ഇന്ത്യക്ക് നല്‍കുന്ന മഹത്തായ സംഭാവനകളിലൊന്നാണ് ഈ തുറമുഖം.

രാജ്യത്ത് ഒരുപാട് തുറമുഖങ്ങളുണ്ടെങ്കിലും മറ്റൊരു തുറമുഖത്തിനും ഇല്ലാത്ത ഒരുപാട് സാധ്യതകളാണ് വിഴിഞ്ഞത്തിനു മുന്നിലുള്ളത്. അതിദീര്‍ഘകാലം അത് ഉപയോഗിക്കപ്പെടാതെയും മനസിലാക്കപ്പെടാതെയും കിടന്നുവെന്നത് നിര്‍ഭാഗ്യകരമായ കാര്യമാണ്. അതിന് അറുതി വരുത്താന്‍ കഴിഞ്ഞിരിക്കുന്നു. 7,700 കോടി മുതല്‍ മുടക്കിയ പദ്ധതിയാണ് വിഴിഞ്ഞം തുറമുഖം. 4,600 കോടി രൂപയാണ് സംസ്ഥാനം ചെലവഴിച്ചത്. 818 കോടി രൂപ കേന്ദ്രവും വഹിച്ചു. രാജ്യത്ത് ആദ്യമായാണ് കേന്ദ്രസര്‍ക്കാര്‍ തുറമുഖ നിര്‍മാണത്തിനായി വയബിലിറ്റി ഗ്യാപ് ഫണ്ട് അംഗീകരിച്ചത്. കേന്ദ്രസര്‍ക്കാരും നല്ല മുന്‍ഗണനയോടുകൂടിത്തന്നെയാണ് പദ്ധതിയെ കാണുന്നത്.

പൊതു-സ്വകാര്യ പങ്കാളിത്തത്തിന്റെ ഉത്തമമാതൃകയായി വളരേണ്ട സംരംഭമാണിത്. മത്സ്യത്തൊഴിലാളികളുടെ പുനരധിവാസത്തിനായി മാത്രം ഇതുവരെ 100 കോടിരൂപ ചെലവഴിച്ചു” – മുഖ്യമന്ത്രി പറഞ്ഞു.