മുഖ്യമന്ത്രിയുടെ ദുരിതാശ്വാസ നിധി തട്ടിപ്പ് ; മരിച്ചയാളിന്റെ പേരിലും ധനസഹായം, പരിശോധന തുടർന്ന് വിജിലൻസ്

കൊല്ലം: മുഖ്യമന്ത്രിയുടെ ദുരിതാശ്വാസ നിധി തട്ടിപ്പുമായി ബന്ധപ്പെട്ട് അന്വേഷണം പുരോഗമിക്കുന്നു. കൊല്ലത്ത് മരിച്ചയാളിന്റെ പേരിലും ധനസഹായം തട്ടിയെന്നാണ് വിജിലൻസിന്റെ സംശയം. അപേക്ഷകൾ പരിശോധിക്കുന്നതിനിടയിലാണ് വിജിലൻസിന് സംശയം തോന്നിയത്. ഇതുമായി ബന്ധപ്പെട്ട് ഡോക്ടർമാരുടെയും ഇടനിലക്കാരുടെയും മൊഴി രേഖപ്പെടുത്തുമെന്ന് വിജിലൻസ് വ്യക്തമാക്കി. അപേക്ഷകന്റെ വീട്ടിൽ ഇന്ന് വിജിലൻസ് പരിശോധന നടത്തുമെന്ന് അറിയിച്ചിട്ടുണ്ട്.

കൊല്ലത്ത് വിജിലൻസ് നടത്തിയ പരിശോധനയിലാണ് മരിച്ചയാളുടെ പേരിൽ തട്ടിപ്പ് നടന്നെന്ന് സംശയം ഉണ്ടായത് .തുടർന്ന് അപേക്ഷകന്റേതായി നൽകിയ ഫോൺ നമ്പറിൽ വിളിച്ച് ചോദിച്ചപ്പോഴാണ് അദ്ദേഹം മുൻപേ മരിച്ചുപോയെന്ന് ബന്ധുക്കൾ അറിയിച്ചത്. ഇതിനെ തുടർന്നാണ് തട്ടിപ്പ് നടന്നോയെന്ന് വിജിലൻസിന് സംശയം ഉണ്ടായത്. അപേക്ഷ നൽകുന്നതിന് മുൻപ് തന്നെ അപേക്ഷകൻ മരിച്ചിരുന്നെന്നാണ് കിട്ടിയ വിവരം.

വിജിലൻസിന്റെ ഇന്റലിജൻസിന് കിട്ടിയ രഹസ്യ വിവരത്തെ തുടർന്നാണ് അന്വേഷണം ആരംഭിച്ചത്.
സർക്കാർ ജീവനക്കാരും ഡോക്ടർമാരും ഇടനിലക്കാരുമെല്ലാം ഉൾപ്പെട്ട വലിയ തട്ടിപ്പാണിതെന്നാണ് അന്വേഷണത്തിൽ വ്യക്തമാവുന്നത്.