രാഹുൽ ഗാന്ധിയുടെ ചൈന സ്‌തുതി പാഴായി; നരേന്ദ്രമോദിയുടെ കീഴിൽ രാജ്യത്തിൻറെ വളർച്ച അംഗീകരിച്ച് ചൈന; ഏഷ്യയിൽ ഏറ്റവും സ്വാധീനമുള്ള മൂന്നാം സ്ഥാനമാണ് ഭാരതമെന്ന് പ്രസ്താവന

ദില്ലി: ഏഷ്യയിലെ ഏറ്റവും സ്വാധീനമുള്ള മൂന്നാമത്തെ രാജ്യമാണ് ഭാരതമെന്ന് അംഗീകരിച്ച് ചൈന. അമേരിക്കയും ചൈനയും കഴിഞ്ഞാൽ മൂന്നാം സ്ഥാനത്തേയ്ക്ക് ജപ്പാനെ പിന്തള്ളി ഇന്ത്യയെത്തിയതായാണ് ചൈനയുടെ വിലയിരുത്തൽ. ഇന്ത്യയിലെ ചൈനീസ് എംബസിയുടെ വക്താവ് യു ജിങ് ആണ് ചൈനീസ് നിലപാട് വ്യക്തമാക്കിയത്. രാഹുൽ ഗാന്ധി ചൈനയെ നിരവധി തവണ പുകഴ്ത്തിയതിന് പിന്നാലെയാണ് നരേന്ദ്രമോദിയുടെ ഭരണത്തിൽ കീഴിൽ രാജ്യം കൈവരിച്ച നേട്ടം ചൈന അംഗീകരിക്കുന്നത്.

ഓസ്‌ട്രേലിയയിലെ ലോയ് ഇൻസ്റ്റിറ്റ്യൂട്ട് 2024 ൽ തയ്യാറാക്കിയ ഏഷ്യ പവർ ഇൻഡക്സിലും ഇന്ത്യ അമേരിക്കയ്ക്കും ചൈനയ്ക്കും പിന്നിൽ മൂന്നാമത്തെ ഏറ്റവും വലിയ സ്വാധീന രാഷ്ട്രമായി മാറിയെന്ന് പറഞ്ഞിരുന്നു. ജപ്പാനെ പിന്തള്ളി ഒരു സ്ഥാനം മെച്ചപ്പെടുത്തിയാണ് ഇന്ത്യ 100 ൽ 39.1 പോയിന്റ് നേടി മൂന്നാം സ്ഥാനത്ത് എത്തിയത്.

സാമ്പത്തിക സ്ഥിരത, സൈനിക ശേഷി, ഭാവി വിഭവങ്ങൾ, സാമ്പത്തിക ബന്ധങ്ങൾ, പ്രതിരോധ നെറ്റ്‌വർക്കുകൾ, നയതന്ത്ര സ്വാധീനം, സാംസ്‌കാരിക സ്വാധീനം തുടങ്ങി നിരവധി മാനദണ്ഡങ്ങൾ പരിശോധിച്ചാണ് ഏഷ്യ പവർ ഇൻഡക്സ് തയ്യാറാക്കുന്നത്. ഈ ഘടകങ്ങളിൽ വന്ന മുന്നേറ്റത്തിന്റെ അടിസ്ഥാനത്തിലാണ് ജപ്പാനെ പിന്തള്ളി ഇന്ത്യ ഒരു റാങ്ക് മുകളിലേയ്ക്ക് കയറിയത്. 27 രാജ്യങ്ങളുടെ പട്ടികയിൽ ഇന്ത്യ ഇപ്പോൾ മൂന്നാം സ്ഥാനത്താണ്. ഈ വസ്തുതകളാണ് ചൈന ഇപ്പോൾ അംഗീകരിച്ചിരിക്കുന്നത്.

രാഹുൽ ഗാന്ധി ഏറ്റവും ഒടുവിലായി പാർലമെന്റിൽ ചെയ്ത 45 മിനുട്ട് നീണ്ട പ്രസംഗത്തിൽ 34 തവണയാണ് ചൈന എന്ന പദം ഉപയോഗിച്ചത്. നമ്മുടെ രാജ്യത്തെ ചൈനയുമായി താരതമ്യം ചെയ്‌ത്‌ ഇകഴ്ത്താനായിരുന്നു അത്. ഉൽപ്പാദന രംഗത്തും എ ഐ സാങ്കേതിക വിദ്യ രംഗത്തും ചൈന കുത്തിക്കുന്നുവെന്നും ഇന്ത്യയുടെ 4000 കിലോമീറ്റർ ഭൂമി ചൈന കൈക്കലാക്കിയെന്നും രാഹുൽ ഗാന്ധി പ്രസംഗത്തിൽ പറഞ്ഞിരുന്നു.