മരണത്തിന്റെ താഴ്വരയായി ചൂരൽമല വില്ലേജ് ഓഫീസ് റോഡ് ! പ്രദേശത്ത് നിന്ന് കണ്ടെത്തിയത് 39 മൃതദേഹങ്ങൾ

ഉരുൾപ്പൊട്ടൽ തകർത്തെറിഞ്ഞ ചൂരൽമലയിൽ ദുരന്തത്തിന്റെ വ്യാപ്തി വിളിച്ച് പറഞ്ഞ് ചൂരൽമല വില്ലേജ് ഓഫീസ് റോഡ്. ഇവിടെ നിന്ന് മാത്രം ആകെ 39 മൃതദേഹങ്ങളാണ് ഇതുവരെയും കണ്ടെടുത്തത്. ഇന്ന് മാത്രം 7 മൃതദേഹങ്ങളും ചില ശരീരഭാഗങ്ങളും കണ്ടെത്തി.

കൂടുതൽ മൃതദേഹങ്ങൾ ലഭിച്ചതോടെ ആറ് മണ്ണുമാന്തി യന്ത്രങ്ങളാണ് ഒരേ സമയം തെരച്ചിൽ നടത്തിയത്. ഉരുൾപ്പൊട്ടലിൽ അടിഞ്ഞ കൂറ്റൻ മരങ്ങളും കല്ലുകളും മാറ്റിയാണ് മൃതദേഹങ്ങൾക്കായി തെരയുന്നത്. ഈ ഭാഗത്തെ കുറിച്ച് രക്ഷാപ്രവർത്തനത്തിന്റെ ആദ്യ ദിവസം അറിവുണ്ടായിരുന്നില്ല. ഇന്നലെയാണ് ഈ ഭാഗത്തേക്ക് എത്തിപ്പെടാൻ രക്ഷാപ്രവർത്തകർക്ക് ഇവിടെ എത്തിച്ചേരാൻ സാധിച്ചത്.

അതേസമയം മുണ്ടക്കൈയിലും ചൂരൽമലയിലും കനത്ത മഴ തുടരുകയാണ്. ഉരുള്‍പ്പൊട്ടലിന്‍റെ പ്രഭവ കേന്ദ്രമായ പുഞ്ചിരിമട്ടം മേഖലയിലാണ് അതിശക്തമായ മഴ പെയ്യുന്നത്. രക്ഷാപ്രവര്‍ത്തകരെയും മാദ്ധ്യമപ്രവര്‍ത്തകരെയും സുരക്ഷിതമായ ഇടങ്ങളിലേക്ക് തിരിച്ചിറക്കി. ഇതുവരെ 281 മരണങ്ങളാണ് സ്ഥിരീകരിച്ചത്. മൂന്ന് ദിവസങ്ങളിലായി നടത്തിയ രക്ഷപ്രവർത്തനങ്ങളിൽ ജീവനോടെയുള്ള എല്ലാവരെയും രക്ഷപ്പെടുത്താൻ കഴിഞ്ഞതായി മുഖ്യമന്ത്രി പിണറായി വിജയന്‍റെ അദ്ധ്യക്ഷതയിൽ ചേർന്ന ഉദ്യോഗസ്ഥതല യോഗം വിലയിരുത്തിയിരുന്നു.