കുരുമുളക് പറിക്കാൻ പാറയുടെ മുകളിൽ കയറി; ഉരുണ്ടുവീണ പാറയുടെ അടിയിൽപ്പെട്ട് യുവാവിന് ദാരുണാന്ത്യം

തിരുവനന്തപുരം: ഉരുണ്ടുവീണ പാറയുടെ അടിയിൽപെട്ട് യുവാവിന് ദാരുണാന്ത്യം. അമ്പൂരിയിലാണ് സംഭവം. കുരുമുളക് പറിക്കാൻ പാറയുടെ മുകളിൽ കയറിയതായിരുന്നു യുവാവ്.എന്നാൽ അതെ പാറ ഉരുണ്ടുവീണ് അടിയിൽപ്പെടുകയായിരുന്നു. ശംഖിൻകോണം കാരികുഴി ശിവാനന്ദ ഭവനിൽ ശിവാനന്ദൻ ആണ് മരിച്ചത്. 35 വയസായിരുന്നു.

ബുധനാഴ്ച കാരിക്കുഴിയിൽ നിന്ന് ഒരു കിലോമീറ്ററോളം അകലെയുള്ള കുന്നത്ത് മലയിലാണ് ശിവാനന്ദൻ കുരുമുളക് പറിക്കാൻ പോയത്. രാത്രി വൈകിയും കാണാത്തതിനെ തുടർന്ന് വീട്ടുകാർ നടത്തിയ തെരച്ചിലിലാണ് വ്യാഴാഴ്ച രാവിലെ മരിച്ച നിലയിൽ കണ്ടെത്തിയത്. തെന്നി തലയിടിച്ച് നിലത്ത് വീണ ശിവാനന്ദന്‍റെ പുറത്തേക്ക് പാറ വീഴുകയായിരുന്നു.