പാറ്റ പാർട്ടി സ്ഥാപകൻ അഭിജിത് ദീപ്‌കെ ദില്ലിയിൽ ! സ്വീകരിക്കാനെത്തിയത് ചുരുക്കം ചിലർ മാത്രം !! പരീക്ഷാ ക്രമക്കേടിൽ രാഷ്ട്രീയ മുതലെടുപ്പിന് ‘കോക്രോച്ച് ജനതാ പാർട്ടി’, ജന്തർ മന്ദറിൽ പ്രതിഷേധം

ദില്ലി : രാജ്യത്തെ പരീക്ഷാ ക്രമക്കേടുകളെയും നീറ്റ് പരീക്ഷാ വിവാദങ്ങളെയും മുൻനിർത്തി സോഷ്യൽ മീഡിയയിൽ രൂപംകൊണ്ട ‘കോക്രോച്ച് ജനതാ പാർട്ടി’ (സിജെപി) രാഷ്ട്രീയ മൈലേജിനായി തെരുവിലേക്ക്. കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാന്റെ രാജി ആവശ്യപ്പെട്ട് ദില്ലിയിൽ ജന്തർ മന്ദറിൽ നടത്തുന്ന പരസ്യ പ്രതിഷേധത്തിൽ പങ്കെടുക്കാൻ പാർട്ടിയുടെ സ്ഥാപകൻ അഭിജീത് ദീപ്‌കെ വിദേശത്ത് നിന്നും ദില്ലിയിലെത്തി. പ്രതീക്ഷിച്ച ആൾക്കൂട്ടം അഭിജീതിനെ സ്വീകരിക്കാൻ വിമാനത്തവാളത്തിൽ എത്തിയില്ല. വിദ്യാർത്ഥികളുടെ ആശങ്കകളെ ഗൗരവമായി സമീപിക്കുന്നതിന് പകരം, സമൂഹമാധ്യമങ്ങളിലെ ട്രോളുകളിലൂടെയും റീലുകളിലൂടെയും ജനശ്രദ്ധ നേടിയ ഈ കൂട്ടായ്മ, പരീക്ഷാ പ്രതിസന്ധിയെ തങ്ങളുടെ ആദ്യ പരസ്യ രാഷ്ട്രീയ ശക്തിപ്രകടനത്തിനുള്ള വേദിയാക്കി മാറ്റുകയാണെന്ന വിമർശനം ഇതിനകം ഉയർന്നിട്ടുണ്ട്.

മുൻപ് ആം ആദ്മി പാർട്ടിയുടെ സോഷ്യൽ മീഡിയ വിങ്ങിൽ പ്രവർത്തിച്ചിരുന്ന കമ്മ്യൂണിക്കേഷൻ സ്ട്രാറ്റജിസ്റ്റ് കൂടിയായ ദീപ്‌കെ, വിദ്യാർത്ഥികളുടെ വൈകാരികമായ വിഷയങ്ങളെ കേവലം ഒരു പബ്ലിസിറ്റി സ്റ്റണ്ടായി മാറ്റാനാണ് ശ്രമിക്കുന്നതെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. പുസ്തകവും ത്രിവർണ്ണ പതാകയുമായി സമരത്തിനെത്താനും, പോലീസുകാർക്ക് പൂക്കൾ നൽകാനും ആഹ്വാനം ചെയ്തുകൊണ്ടുള്ള ദീപ്‌കെയുടെ ട്വീറ്റുകൾ സോഷ്യൽ മീഡിയയിൽ കൈയ്യടി നേടാനുള്ള മറ്റൊരു തന്ത്രം മാത്രമാണെന്നും ആക്ഷേപമുണ്ട്. ഗൗരവമേറിയ ഒരു വിഷയത്തിൽ കൃത്യമായ രാഷ്ട്രീയ പരിഹാരങ്ങൾ നിർദ്ദേശിക്കുന്നതിന് പകരം, ‘കോക്രോച്ച്’ എന്ന പേരിൽ പരിഹാസ സ്വഭാവമുള്ള കൂട്ടായ്മയുണ്ടാക്കി വിമാനത്താവളത്തിലും അതിർത്തികളിലും വലിയ രീതിയിൽ സുരക്ഷാ പ്രശ്നങ്ങളും യാത്രാക്ലേശവും സൃഷ്ടിക്കാനാണ് ഇവർ ശ്രമിക്കുന്നത്.

പ്രതിഷേധം കണക്കിലെടുത്ത് കേന്ദ്രമന്ത്രിയുടെ വസതി ഉൾപ്പെടെ ഡൽഹിയിലുടനീളം സുരക്ഷ ശക്തമാക്കിയിട്ടുണ്ട്. ദില്ലി വിമാനത്താവളം, അതിർത്തി പ്രവേശന കവാടങ്ങൾ എന്നിവിടങ്ങളിൽ വൻ പൊലീസ് സന്നാഹത്തെയാണ് വിന്യസിച്ചിരിക്കുന്നത്. എസ്.എഫ്.ഐ. ഉൾപ്പെടെയുള്ള ചില വിദ്യാർത്ഥി സംഘടനകൾ സമരത്തിന് പിന്തുണ പ്രഖ്യാപിച്ചിട്ടുണ്ടെങ്കിലും, കൃത്യമായ രാഷ്ട്രീയ അടിത്തറയോ ലക്ഷ്യബോധമോ ഇല്ലാത്ത ഇത്തരം പ്രസ്ഥാനങ്ങൾ വിദ്യാർത്ഥി പ്രക്ഷോഭങ്ങളുടെ അന്തസ്സ് കെടുത്തുമെന്ന ആശങ്കയും ശക്തമാണ്. രാവിലെ ഒൻപതിന് ആരംഭിക്കുന്ന പ്രതിഷേധത്തിൽ ഒറ്റയ്ക്ക് വരാതെ ഗ്രൂപ്പുകളായി വരണമെന്ന പാർട്ടിയുടെ നിർദ്ദേശം തലസ്ഥാനത്ത് മനഃപൂർവ്വം സംഘർഷാവസ്ഥ സൃഷ്ടിക്കാനുള്ള നീക്കമാണോ എന്നും സംശയിക്കപ്പെടുന്നു.

–