ക്ഷമ ചോദിക്കാനുള്ള വിവേകം കോൺഗ്രസിനില്ല;അസഭ്യ പരാമർശങ്ങൾക്ക് പിന്തുണ നൽകുന്നത് ഗാന്ധി കുടുംബം;വിവാദത്തിൽ പ്രതികരിച്ച് കേന്ദ്ര മന്ത്രി സ്‌മൃതി ഇറാനി

ദില്ലി : ഇന്ത്യൻ സൈന്യത്തെ അപമാനിച്ച കോൺഗ്രസ് നേതാക്കൾ, അവർ ആവർത്തിക്കുന്ന അസഭ്യ പരാമർശങ്ങൾക്ക് ക്ഷമാപണം നടത്തുമെന്ന പ്രതീക്ഷ തനിക്കില്ലെന്ന് കേന്ദ്രമന്ത്രി സ്മൃതി ഇറാനി. മോശം പരാമർശം നടത്തുന്ന നേതാക്കളെ കോൺഗ്രസും ഗാന്ധി കുടുംബവുമാണ് സംരക്ഷിക്കുന്നതെന്നും കേന്ദ്രമന്ത്രി ആരോപിച്ചു.

ഗാന്ധി കുടുംബത്തിന്റെ സർട്ടിഫിക്കറ്റ് ലഭിച്ച കോൺഗ്രസ് എന്തുതരം സംസ്‌കാരമാണ് കാണിക്കുന്നതെന്നു മന്ത്രി ചോദിച്ചു. പ്രധാനമന്ത്രിയെക്കുറിച്ചും ഇന്ത്യൻ സൈന്യത്തെക്കുറിച്ചും മറ്റ് ബിജെപി നേതാക്കളെക്കുറിച്ചും തന്നെക്കുറിച്ചും അധിക്ഷേപകരമായ പരാമർശമാണ് കോൺഗ്രസ് നടത്തുന്നത്. മര്യാദകെട്ട വാക്കുകൾ അവർ സ്ഥിരമായി പ്രയോഗിക്കുന്നു. ഗാന്ധി കുടുംബത്തിന് അത് ഇഷ്ടവുമാണ്. അവർ അതിനെ പിന്തുണയ്‌ക്കുന്നുമുണ്ട്. പിന്നെയെന്തിന് കോൺഗ്രസ് നേതാക്കൾ അവർ നടത്തുന്ന അസഭ്യ പരാമർശത്തിന് മാപ്പ് പറയണം? ഇതാണ് കോൺഗ്രസിന്റെ യഥാർത്ഥ മുഖമെന്ന് സ്മൃതി ഇറാനി പ്രതികരിച്ചു.

കഴിഞ്ഞ ദിവസം സ്മൃതിക്കെതിരെ യുപിയിലെ കോൺഗ്രസ് നേതാവ് അജയ് റായ് ആണ് സ്ത്രീവിരുദ്ധ പരാമർശം നടത്തിയത്. ലൈംഗിക ചുവയോടെ സംസാരിച്ചതിനും അപകീർത്തിപ്പെടുത്തിയതിനും ഇയാൾക്കെതിരെ പോലീസ് കേസെടുത്തു. സ്ത്രീകളോടുള്ള ഗാന്ധി കുടുംബത്തിന്റെ നിലപാട് വ്യക്തമായെന്നും അജയ് റായിയെ പോലെയുള്ളവരെ കോൺഗ്രസ് പ്രോത്സാഹിപ്പിക്കുകയാണ് എന്നുമായിരുന്നു സ്മൃതി ഇറാനിയുടെ പ്രതികരണം.