കോണ്‍ഗ്രസിന്‍റെ ഭാവി ധനമന്ത്രി ഐപാഡിൽ ബജറ്റുമായി വരും: നിർമ്മലാ സീതാരാമനെ പരിഹസിച്ച് പി ചിദംബരം

ദില്ലി: ബജറ്റ് അവതരണത്തിനായി ഫയല്‍ പട്ടില്‍ പൊതിഞ്ഞെത്തിയ നിര്‍മല സീതാരാമനെ പരിഹസിച്ച് മുന്‍ ധനകാര്യമന്ത്രി പി ചിദംബരം.
കോണ്‍ഗ്രസിന്‍റെ ഭാവി ധനമന്ത്രി തന്‍റെ ഐപാഡിലായിരിക്കും ബജറ്റുമായി വരുകയെന്നാണ് ചിദംബരം പറഞ്ഞത്.

ഈ സാമ്പത്തിക വര്‍ഷത്തെ ബജറ്റ് വിരസമാണ്. വരുമാനമോ ചെലവോ ധനകമ്മിയോ കൃത്യമായി വ്യക്തമാക്കുന്നില്ല. രാജ്യത്തെ ഒരു വിഭാഗത്തിനും ആശ്വാസം പകരുന്നതല്ല ബജറ്റ്. രാജ്യത്ത് നികുതിയടക്കുന്ന ഓരോരുത്തര്‍ക്കും ഭാരമാകുന്നതാണ് മോദി സര്‍ക്കാരിന്‍റെ ബജറ്റെന്നും അദ്ദേഹം കുറ്റപ്പെടുത്തി.

സാധാരണയായി ബ്രീഫ്കേസുമായാണ് ബജറ്റ് അവതരണത്തിന് ധനമന്ത്രിമാര്‍ എത്താറുള്ളത്. എന്നാല്‍ ഇത്തവണ അശോക ചിഹ്നം പതിച്ച ചുവന്ന പട്ടു തുണിയില്‍ പൊതിഞ്ഞ ഫയലുകളുമായാണ് നിര്‍മലാ സീതാരാമന്‍ തന്‍റെ ആദ്യ ബജറ്റ് അവതരണത്തിനായെത്തിയത്. ഇതാണ് ഇന്ത്യയുടെ മുന്‍ ധനമന്ത്രിയെ ചൊടിപ്പിച്ചത്