വീണ്ടും സസ്പെൻസ്; കോൺഗ്രസ് അദ്ധ്യക്ഷ സ്ഥാനത്തേക്ക് രാഹുലും പ്രിയങ്കയും ഇല്ല: പേരുകൾ നിർദ്ദേശിച്ചതായി പ്രശാന്ത് കിഷോർ

ദില്ലി: തെരഞ്ഞെടുപ്പ് തന്ത്രജ്ഞൻ പ്രശാന്ത് കിഷോർ കോൺഗ്രസിനെ രക്ഷിക്കാൻ എത്തുന്നുവെന്ന അഭ്യൂഹങ്ങൾ കെട്ടടങ്ങുന്നു. കോൺഗ്രസിലേക്ക് വരാനുള്ള സോണിയ ഗാന്ധിയുടെ ക്ഷണം നിരസിച്ചതിൽ പ്രതികരിച്ച് രാഷ്‌ട്രീയ തന്ത്രജ്ഞൻ പ്രശാന്ത് കിഷോർ.

തൽക്കാലം കോൺഗ്രസിൽ ചേരുന്നില്ലെന്നാണ് കിഷോർ വ്യക്തമാക്കിയിരിക്കുന്നത്. നിലവിൽ കോൺഗ്രസിന് ഒറ്റയ്‌ക്ക് നിന്ന് മുന്നേറാൻ സാധിക്കുമെന്നും അതിന് തന്റെ സഹായം ആവശ്യമില്ലെന്നും പ്രശാന്ത് കിഷോർ പറഞ്ഞു. ഒരു ദേശീയ ചാനലിന് നൽകിയ അഭിമുഖത്തിലാണ് പ്രശാന്ത് കിഷോറിന്റെ പ്രതികരണം.

പാർട്ടിയുടെ ഭാവിയെക്കുറിച്ച് കോൺഗ്രസ് നേതൃത്വവുമായി നിരവധി കാര്യങ്ങൾ ചർച്ച ചെയ്‌തെന്നും മിക്കതിലും അഭിപ്രായവ്യത്യാസം ഇല്ലാതെ യോജിച്ച് പോകുന്നുമുണ്ടെന്നും അദ്ദേഹം പറഞ്ഞു. എന്നാൽ ഇപ്പോൾ പാർട്ടിക്ക് സ്വയം മുന്നേറാനും വിജയിക്കാനും സാധിക്കും. അതിന് തന്റെ ആവശ്യമില്ലെന്നും പ്രശാന്ത് കിഷോർ പറഞ്ഞു.

അതേസമയം കോൺഗ്രസ് അദ്ധ്യക്ഷ സ്ഥാനത്തേക്ക് പേരുകൾ നിർദ്ദേശിച്ചിട്ടുണ്ടെങ്കിലും അതിൽ രാഹുലിന്റെയോ പ്രിയങ്കയുടേയോ പേരില്ല. പാർട്ടി സ്വകാര്യമായി എടുത്ത തീരുമാനം പരസ്യമാക്കാനാവില്ല എന്നും പ്രശാന്ത് കിഷോർ കൂട്ടിച്ചേർത്തു. കൂടാതെ രാഹുൽ ഗാന്ധിയുടെ സ്ഥാനം തീരുമാനിക്കാൻ താൻ ആരാണ് എന്നും അദ്ദേഹം ചോദിച്ചു. കഴിഞ്ഞ ദിവസം പ്രിയങ്കയെ കോൺഗ്രസ് അദ്ധ്യക്ഷ സ്ഥാനത്തേക്ക് പ്രശാന്ത് കിഷോർ നിർദ്ദേശിച്ചുവെന്ന വാർത്തകൾ പുറത്തുവന്നിരുന്നു. ഇതിന് പിന്നാലെയാണ് പ്രതികരണം.