‘കളിപ്പാട്ടം നഷ്ടപ്പെട്ട കുട്ടിയെപ്പോലെയാണ് കോൺഗ്രസിന്റെ പെരുമാറ്റം’; എക്‌സിറ്റ് പോൾ ചർച്ചകൾ ബഹിഷ്‌കരിച്ചതിന് കോൺഗ്രസിനെ പരിഹസിച്ച് ജെ പി നദ്ദ

ദില്ലി: എക്‌സിറ്റ് പോൾ ടെലിവിഷൻ ചർച്ചകളിൽ പങ്കെടുക്കേണ്ടതില്ലെന്ന കോൺഗ്രസ് പാർട്ടിയുടെ തീരുമാനത്തെ പരിഹസിച്ച് ബിജെപി അദ്ധ്യക്ഷൻ ജെപി നദ്ദ രംഗത്ത്. കളിപ്പാട്ടം നഷ്ടപ്പെട്ട കുട്ടിയെപ്പോലെയാണ് കോൺഗ്രസ് പെരുമാറുന്നതെന്ന് നദ്ദ പറഞ്ഞു. കോൺഗ്രസിന്റെ ഇത്തരം പെരുമാറ്റം പ്രതീക്ഷിച്ചതാണ്. ഇതിൽ ആശ്ചര്യപ്പെടാനില്ല, കാരണം ഫലം തങ്ങൾക്ക് അനുകൂലമാകുമെന്ന് പ്രതീക്ഷിക്കാത്ത സമയത്തൊക്കെ ഒഴിവാക്കുന്നത് കോൺഗ്രസിനെ സംബന്ധിച്ചിടത്തോളം സാധാരണയാണ് എന്ന് നദ്ദ വ്യക്തമാക്കി

ലോക്‌സഭാ തെരഞ്ഞെടുപ്പിൻ്റെ അവസാന ഘട്ട സമാപനത്തിന് ശേഷം എക്‌സിറ്റ് പോളുകൾ പ്രസിദ്ധീകരിക്കാൻ ഒരു ദിവസം ബാക്കിയായിരിക്കെയാണ് ഊഹാപോഹങ്ങളിൽ ഏർപ്പെടാൻ താത്പര്യം ഇല്ലെന്ന് പറഞ്ഞ് എക്‌സിറ്റ് പോൾ ചർച്ചകളിൽ പങ്കെടുക്കില്ലെന്ന് കോൺഗ്രസ് പ്രഖ്യാപിച്ചത്. ഏതൊരു സംവാദത്തിൻ്റെയും ഉദ്ദേശ്യം ജനങ്ങളെ വിവരം അറിയിക്കലാണെന്നും എന്നാൽ ഈ സാഹചര്യത്തിൽ ആർക്കാണ് വോട്ട് ചെയ്തതെന്ന് ജനങ്ങൾക്ക് അറിയാമെന്നും കോൺഗ്രസ് വക്താവ് പവൻ ഖേര പറഞ്ഞു.
എന്നാൽ പരാജയം കോൺഗ്രസ് ഉറപ്പിച്ചതിനാലാണ് ചർച്ചകളിൽ അവർ പങ്കെടുക്കാത്തതെന്നാണ് സമൂഹമാദ്ധ്യമങ്ങളിലടക്കം അഭിപ്രായം ഉയരുന്നത്.