യാത്രക്കാരുടെ നിരന്തര ആവശ്യം!കൊച്ചുവേളിയിൽനിന്ന് ബെംഗളൂരുവിലേക്ക് സ്പെഷ്യൽ ട്രെയിൻ അനുവദിച്ച് റെയിൽവേ ; ഈ ഞായറാഴ്ച സർവീസ് ആരംഭിക്കും

പത്തനംതിട്ട ; യാത്രക്കാരുടെ നിരന്തര ആവശ്യം കണക്കിലെടുത്ത് ദക്ഷിണ റെയിൽവേ ബെംഗളൂരുവിലേക്ക് ഞായറാഴ്ചകളിൽ സ്പെഷ്യൽ ട്രെയിൻ അനുവദിച്ചു. കൊച്ചുവേളി–ബെംഗളൂരു എസ്എംവിടി സ്പെഷൽ (06211) ഞായറാഴ്ചകളിൽ വൈകുന്നേരം 5 മണിക്ക് കൊച്ചുവേളിയിൽനിന്നു പുറപ്പെട്ടു പിറ്റേന്ന് രാവിലെ 10ന് ബെംഗളൂരുവിലെത്തും. മടക്ക യാത്രയിൽ (06212) തിങ്കളാഴ്ചകളിൽ ഉച്ചയ്ക്ക് 1ന് ബെംഗളൂരുവിൽനിന്നു പുറപ്പെട്ടു പിറ്റേന്ന് രാവിലെ 6.50ന് കൊച്ചുവേളിയിലെത്തും.

സെക്കൻഡ് എസി–2, തേ‍ഡ് എസി–6, സ്ലീപ്പർ–6, ജനറൽ സെക്കൻഡ്–3 എന്നിങ്ങനെ കോച്ചുകളുണ്ടാകും. കൊല്ലം, കായംകുളം, മാവേലിക്കര, ചെങ്ങന്നൂർ, തിരുവല്ല, ചങ്ങനാശേരി, കോട്ടയം, എറണാകുളം ടൗൺ, ആലുവ, തൃശൂർ, പാലക്കാട്, കോയമ്പത്തൂർ, തിരുപ്പുർ, ഈറോഡ്, സേലം, ധർമപുരി, ഹൊസൂർ. എന്നിവിടങ്ങളിൽ ട്രെയിനിന് സ്റ്റോപ്പ് അനുവദിക്കും. ബുക്കിങ് ആരംഭിച്ചു.

കൊച്ചുവേളി–മംഗളൂരു അൺറിസർവ്ഡ് സ്പെഷൽ (06649) തിങ്കളാഴ്ചകളിൽ സർവീസ് നടത്തും. രാത്രി 9.25ന് കൊച്ചുവേളിയിൽനിന്നു പുറപ്പെട്ടു പിറ്റേ ദിവസം രാവിലെ 9.15ന് മംഗളൂരുവിലെത്തിച്ചേരും. ആലപ്പുഴ വഴിയാണു സർവീസ്. കൊല്ലം, കായംകുളം, ആലപ്പുഴ, എറണാകുളം, തൃശൂർ, ഷൊർണൂർ, തിരൂർ, കോഴിക്കോട്, കണ്ണൂർ, കാസർഗോഡ്. എന്നിവിടങ്ങളിൽ സ്റ്റോപ്പ് അനുവദിക്കും. മടക്ക യാത്രയിൽ ട്രെയിൻ (06650) ചൊവ്വാഴ്ച രാത്രി 9.10ന് മംഗളൂരുവിൽ നിന്ന് പുറപ്പെട്ടു ബുധൻ രാവിലെ 8ന് കൊച്ചുവേളിയിലെത്തും.