‘കൊറോണ ഗാര്‍ഡ്’: കോവിഡിനെ പ്രതിരോധിക്കാൻ ഇനി കൊറോണ മിഠായി; ഒരു മിഠായി കഴിച്ചാല്‍ 10 മുതൽ 12 മണിക്കൂര്‍ വരെ ഗുണം….

ചെന്നൈ: കോവിഡിനെ പ്രതിരോധിക്കാൻ ഇനി കൊറോണ മിഠായിയും (Corona Candy For Covid Defense). പൂനെ ഇന്ററാക്ടീവ് റിസര്‍ച് സ്‌കൂള്‍ ഫോര്‍ ഹെല്‍ത്ത് അഫയേഴ്‌സ് ആണ് കൊറോണ ഗാര്‍ഡ്’ എന്ന കോവിഡ് പ്രതിരോധ മിഠായി വികസിപ്പിച്ചെടുത്തിരിക്കുന്നത്. തമിഴ്‌നാട് ആരോഗ്യ വകുപ്പുമായി ചേര്‍ന്ന് ചെന്നൈ ഫ്രോണ്ടിയര്‍ മെഡിവില്ലെ ആശുപത്രി ഇതിന്റെ ക്ലിനിക്കല്‍ പരീക്ഷണവും പൂർത്തിയാക്കിയിരിക്കുകയാണ്.

കോവിഡ് വകഭേദങ്ങള്‍ക്കെതിരേ ഈ മിഠായി 98.4% ഫലപ്രദമാണെന്നു തെളിഞ്ഞതായി ആശുപത്രി ചെയര്‍മാനും സിഇഒയുമായ ഡോ. കെഎം ചെറിയാന്‍ പറഞ്ഞു. കുട്ടികള്‍ ഉള്‍പ്പെടെയുള്ളവര്‍ക്കു സുരക്ഷിതമായി ഉപയോഗിക്കാവുന്നവയാണ് ഈ പ്രതിരോധ മിഠായികള്‍. പച്ചവെളിച്ചെണ്ണ, ആവണക്കെണ്ണ തുടങ്ങിയവയുടെ പ്രത്യേക മിശ്രിതമാണു മിഠായിയുടെ അടിസ്ഥാന ഘടകം. കൈകള്‍ സോപ്പിട്ടു കഴുകുമ്പോള്‍ കോവിഡ് വൈറസിന്റെ പുറമേയുള്ള ആവരണം പൊട്ടി വൈറസ് ഇല്ലാതാകുന്ന അതേ തത്വമാണ് ഇവിടെയും പ്രയോഗിച്ചിരിക്കുന്നത്.

എണ്ണയുടെ ആവരണം തൊണ്ടയില്‍ നിലനില്‍ക്കുമ്പോള്‍ വൈറസ് നശിക്കുമെന്നു ഡോക്ടര്‍ പറയുന്നു. ഒരു മിഠായി കഴിച്ചാല്‍ 10-12 മണിക്കൂര്‍ ഗുണം കിട്ടും. പ്രതിരോധ മിഠായികള്‍ ഈ വര്‍ഷം വിപണിയിലെത്തുമെന്നും ഡോ. ചെറിയാന്‍ അറിയിച്ചു. പാര്‍ശ്വഫലങ്ങളൊന്നുമില്ലാതെ സാധാരണ മിഠായി പോലെ കഴിക്കാമെന്നതിനാല്‍ ഡ്രഗ് കണ്‍ട്രോളറുടെ അനുമതി ആവശ്യമില്ല. 10 രൂപയില്‍ താഴെയാണ് ഒരു മിഠായിയുടെ ഒന്നിന് വില.