കോവിഡ് ആശങ്ക ഒഴിയുന്നു; 24 മണിക്കൂറിനിടെ 15,102 പേർക്ക് മാത്രം രോഗം; 176 കോടി പിന്നിട്ട് വാക്‌സിനേഷൻ

ദില്ലി: രാജ്യത്ത് കോവിഡ് ആശങ്ക (Covid India) ഒഴിയുന്നു. കഴിഞ്ഞ 24 മണിക്കൂറിനിടെ 15,102 കോവിഡ് കേസുകളാണ് പുതുതായി റിപ്പോർട്ട് ചെയ്തത്. 31,377 പേർ കഴിഞ്ഞ ദിവസം രോഗമുക്തി നേടി. കോവിഡ് ബാധിച്ച് വിവിധ സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി ചികിത്സയിൽ കഴിയുന്നവരുടെ എണ്ണം രണ്ട് ലക്ഷത്തിൽ താഴെ തുടരുകയാണ്. 1,64,522 പേരാണ് നിലവിൽ ചികിത്സയിലുള്ളത്.

അതേസമയം രാജ്യത്ത് രോഗമുക്തി നേടിയവരുടെ എണ്ണം 4,21,89,887 ആയി. 1.28 ശതമാനമാണ് പ്രതിദിന പോസിറ്റിവിറ്റി നിരക്ക്. കേന്ദ്ര ആരോഗ്യമന്ത്രാലയമാണ് ഈ റിപ്പോർട്ട് പുറത്തുവിട്ടത്. കഴിഞ്ഞ 24 മണിക്കൂറിനിടെയുണ്ടായ 278 മരണങ്ങളാണ് കോവിഡ് മൂലമാണെന്ന് സ്ഥിരീകരിച്ചത്. ഇതോടെ രാജ്യത്തെ ആകെ കൊറോണ മരണം 5,12,622 ആയി. രാജ്യത്ത് കോവിഡ് വാക്‌സിൻ വിതരണം 1,76,19,39,020 ആയെന്ന് ആരോഗ്യമന്ത്രാലയം വ്യക്തമാക്കി.

കേരളത്തിലും രോഗവ്യാപനം കുറയുകയാണ്. കഴിഞ്ഞദിവസം സംസ്ഥാനത്ത് 5,691 പേര്‍ക്ക് മാത്രമാണ് രോഗം സ്ഥിരീകരിച്ചു. എറണാകുളം 1041, കോട്ടയം 655, തിരുവനന്തപുരം 615, കൊല്ലം 496, തൃശൂര്‍ 479, കോഴിക്കോട് 448, ആലപ്പുഴ 338, ഇടുക്കി 301, പത്തനംതിട്ട 293, മലപ്പുറം 264, പാലക്കാട് 247, വയനാട് 222, കണ്ണൂര്‍ 206, കാസര്‍ഗോഡ് 86 എന്നിങ്ങനെയാണ് ജില്ലകളിലെ രോഗബാധാ നിരക്ക്.